قوم نے جتنا گھبرانا تھا گھبرا چکی، اب خان صاحب کی باری ہے:مولا بخش چانڈیو

قوم نے جتنا گھبرانا تھا گھبرا چکی، اب خان صاحب کی باری ہے:مولا بخش چانڈیو
کراچی:مرکزی ترجمان پاکستان پیپلز پارٹی اور سینیٹر مولابخش چانڈیو نے کہا ہے کہ قوم نے جتنا گھبرانا تھا گھبرا چکی، اب گھبرانے کی باری خان صاحب کی ہے۔
اپنے ایک بیان میں پاکستان پیپلز پارٹی کے سیکریٹری اطلاعات اور سینیٹر مولا بخش چانڈیو کا کہنا تھا کہ آج پھر وزیراعظم عمران خان نے آمریت کی پرچار کی،عمران خان نے ایک آمر کے دور کو پاکستان کا فخریہ دور قرار دے کر جمہوریت کی نفی کی،خان صاحب جمہوریت کی برائی اور آمریت کے گن گاتے نہیں تھکتے، عمران خان نوجوان نسل کو مسلسل گمراہ کر رہے ہیں،خان صاحب نے صنعت و زراعت سمیت ہر شعبہ تباہ کر دیا،عمران خان قوم کو گمراہ کر کے فکری زوال کی طرف لے جانی کی کوشش کر رہے ہیں،قوم ڈیڑھ سال کی کارکردگی کا پوچھتی ہے تو یہ کہتے ہیں گھبرانا نہیں،اب خان صاحب فرماتے ہیں کہ گھبرانا نہیں کی بات وہ پانچ سال تک کرتے رہیں گے۔ان کا مزید کہنا تھا کہ سلیکٹڈ کو یاد رکھنا چاہئے کہ وزیراعظم تقریروں کیلئے نہیں مسائل کے حل کیلئے ہوتا ہے،قوم نے جتنا گھبرانا تھا گھبرا چکی، اب گھبرانے کی باری خان صاحب کی ہے۔