سانحہ مری: پنجاب حکومت کا چار افسران کو معطل کرکے انکوائری کرنے کیلئےوفاق کو مراسلہ

تفصیلات کے مطابق  پنجاب حکومت نے چار افسران کو معطل کرکے انکوائری کرنے کےلئے وفاق کو  مراسلہ لکھ دیا ہے،پنجاب حکومت کا کہنا ہے کہ  سابق کمشنر راولپنڈی گلزار شاہ، سابق ڈپٹی کمشنر راولپنڈی محمد علی کو معطل کرکے انکوائری کی جائے،  سابق سی پی او راولپنڈی ساجد کیانی، سابق اے ایس پی مری احمد شاہ کو معطل کرکے انکوائری کی جائے۔

خیال رہے کہ  اس سے قبل ان افسران کو پنجاب حکومت او ایس ڈی کرچکی ہے۔ وفاق کے افسران کو پنجاب حکومت معطل کرنے کا اختیار نہیں رکھتی۔ پنجاب حکومت نے انکوائری رپورٹ کی کاپی بھی وفاق کو بھیج دی۔

گزشتہ ہفتے  پنجاب حکومت نے افسران کو ہٹانے اور نئے تعینات کرنے والے افسران کا نوٹی فکیشن جاری کردیا تھا، کمشنر راولپنڈی ڈویژن گلزار شاہ کو او ایس ڈی بنا دیا گیا ،  سیکرٹری اسپورٹس نورا لامین مینگل کمشنر راولپنڈی ڈویژن تعینات کردیے گئے تھے۔ڈپٹی کمشنر راولپنڈی محمد علی کو او ایس ڈی بنا دیا گیا،  ڈپٹی کمشنر سیالکوٹ طاہر فاروق ڈپٹی کمشنر راولپنڈی تعینات کردیئے گئے، سی پی او راولپنڈی ساجد کیانی کو او ایس ڈی  بنادیا جبکہ  آر پی او اشفاق احمد خان کو سی پی او راولپنڈی کا اضافی چارج بھی دیدیا گیا تھا۔