جدہ: سعودی گولڈ مارکیٹ میں سونے کے نرخوں میں اضافہ ریکارڈ کیا گیا ہے۔

سعودی خبررساں ادارے کے مطابق سعودی گولڈ مارکیٹ میں گزشتہ روز سونے کے نرخوں میں اضافہ ریکارڈ کیا گیا، 24 قیراط ایک گرام سونے کی قیمت 236.19 ریال، 22 قیراط ایک گرام 218.94 اور 18 قیراط 179.13 ریال رہی جبکہ 21 قیراط ایک گرام سونا 208.99 ریال میں فروخت کیا جاتا رہا۔

گولڈ مارکیٹ میں21قیراط 8 گرام کی گنی 2,006.26 ریال، 22 قیراط کی گنی 2,101.80 ریال جبکہ 24 قیراط 8 گرام کی گنی 2,292.87 ریال میں فروخت کی جاتی رہی۔

اسلام آباد: صدر مملکت ڈاکٹر عارف علوی نے نیشنل بینک آف پاکستان کو فراڈ سے متاثرہ خاتون کو 87 ہزار روپے واپس کرنے کی ہدایت کی ہے۔

ہفتہ کو ایوان صدر کے پریس ونگ سے جاری بیان کے مطابق نیشنل بینک کے عملے نے خاتون کی ناخواندگی کا فائدہ اٹھاتے ہوئے اسے فراڈ کا نشانہ بنایا تھا، بینک عملہ اکائونٹ سے زیادہ رقم نکالتا، کچھ رقم پاس رکھتا اور خاتون کو صرف تین سے پانچ ہزار روپے ادا کرتا۔

صدر مملکت نے نیشنل بینک کو فراڈ سے متاثرہ خاتون کو 87 ہزار روپے واپس کرنے اور فراڈ میں ملوث ملازمین کے خلاف کارروائی کرنے کی بھی ہدایت کی ہے۔ صدر مملکت نے کہا کہ بینک کے عملے نے ناخواندہ خاتون کا استحصال کیا ، بینک ایسے دھوکہ بازوں سے چوکنا رہے۔

صدر مملکت نے بینکنگ محتسب کے احکامات کے خلاف نیشنل بینک کی اپیل مسترد کر دی۔ تفصیلات کے مطابق شیر محمد (شکایت کنندہ) کا اپنی بہن منظور فاطمہ کے ساتھ نیشنل بینک میں مشترکہ اکائونٹ تھا، بہن ایک ناخواندہ خاتون تھی جو رقم نکالنے کے لیے بینک جاتی تھی، بینک عملہ نے خاتون کی ناخواندگی کا فائدہ اٹھاتے ہوئے اسے اس کی رقم سے محروم کردیا۔

شکایت کنندہ کے مطابق اکائونٹ میں تقریباً 2 لاکھ روپے تھے جو دھوکہ دہی کی وجہ سے صرف 11 ہزار روپے رہ گئے۔ شکایت کنندہ نے بینکنگ محتسب کو شکایت کی جس نے اس کے حق میں حکم جاری کیا لیکن بعد ازاں ، نیشنل بینک نے بینکنگ محتسب کے فیصلے کے خلاف صدر مملکت کے پاس اپیل دائر کی۔

اسلام آباد: وفاقی وزیرخزانہ ومحصولات سینیٹرمحمداسحاق ڈارنے کہاہے کہ ملکی معیشت مشکلات کاشکارہے لیکن بہتری کی امیدہے، کچھ لوگوں کوملک کے دیوالیہ ہونے کاشوق ہے لیکن ایسا نہیں ہوگا۔

جولوگ ملک کے دیوالیہ ہونے کی تاریخیں دے رہے ہیں انہیں شرم آ نی چاہئیے، کاروباری طبقے کے جائز مطالبات کونہ صرف تسلیم کریں گے بلکہ سہولیات بھی دی جائیں گی

 ہفتہ کویہاں میڈیا سے گفتگو کرتے ہوئے انہوں نے کہاکہ ملک مشکل اقتصادی صورتحال اورچیلنجوں کا سامنا کررہاہے مگر تمام شراکت داروں کے تعاون سے ان مسائل پرقابو پالیا جائیگا۔

انہوں نے کہاکہ 2013 میں بھی ملک کواسی طرح کی چیلنجوں کاسامنا تھا اوراس وقت بھی ملک کے دیوالیہ ہونے کی باتیں کی جارہی تھی تاہم اس وقت بھی مسلم لیگ ن کی قیادت نے تاجروں اورصنعت کاروں سمیت شراکت داروں کی معاونت سے چیلنجوں پرقابو پایا اورپاکستان کی معیشت دنیا کی 24 ویں بڑی معیشت بن گئی جسے بدقسمتی سے گزشتہ ساڑھے چار برسوں میں 47 ویں معیشت بنادیاگیا۔

جدہ: سعودی کھجورکی برآمدات میں اضافہ ریکارڈ کیا گیا ہے جبکہ چیناس کا سب سے بڑا خریدار ہے۔

سعودی نشریاتی ادارے کے مطابق قومی مرکز برائے کھجور کی جانب سے جاری کردہ اعدادوشمار کے مین بتایا گیا ہے کہ سعودی عرب 111 ملکوں کو کھجوریں برآمد کر رہا ہے۔ چھ ممالک سرفہرست ہیں۔ سب سے زیادہ کھجوریں چین کو برآمد کی گئی ہیں۔

آسٹریا دوسرے، بیلجئم تیسرے، ترکیہ چوتھے، روس پانچویں اور کینیڈا چھٹے نمبر پر ہے۔ اس سے قبل قومی مرکز برائے کھجور نے بتایا تھا کہ ’2016سے 2022 تک کھجوروں کی برآمدات میں 121 فیصد اضافہ ہوا ہے۔یاد رہے کہ سعودی عرب دنیا بھر میں کھجوروں کا دیس مانا جاتا ہے۔ انواع و اقسام کی سعودی کھجوریں پوری دنیا میں پسند کی جاتی ہیں۔

اسلام آباد: ملک بھر میں گزشتہ 24 گھنٹوں کے دوران کورونا وائرس کے8 مثبت کیس سامنے آئے ہیں جن میں سے 7مریض انتہائی نگہداشت میں رکھے گئے ہیں۔

ہفتہ 3 جون 2023کو نیشنل کمانڈ اینڈ آپریشنل سنٹر (این سی او سی) این آئی ایچ، کی طرف سے جاری اعدادوشمار کے مطابق ملک بھر میں گزشتہ 24 گھنٹوں کے دوران کورونا وائرس کے 2 ہزار 479 ٹیسٹ کیے گئے جن میں سے 8 افراد کے ٹیسٹ مثبت آئے ہیں۔

رپورٹ کے مطابق مجموعی طور پر مثبت کیسز کی شرح0.32فیصد ریکارڈ کی گئی ہے اور اس دوران کوئی بھی اموات ریکارڈ نہیں ہوئیں تاہم انتہائی نگہداشت میں رکھے گئے مریضوں کی تعداد 7 ہے۔

این سی او سی کے اعدادوشمار کے مطابق گزشتہ 24 گھنٹوں کے دوران لاہور میں 165 ٹیسٹ کئے گئے جن میں سے 3 ٹیسٹ مثبت آئے ہیں اور مثبت کیسز کی شرح 1.82 فیصد رہی۔

اسلام آباد: وزیر مملکت برائے خارجہ امور حنا ربانی کھر5 سے13 جون 2023 تک ناروے، سویڈن، ڈنمارک اور بیلجئم کے سرکاری دورے کریں گی۔

ترجمان دفتر خارجہ کی طرف سے ہفتہ کو جاری بیان کے مطابق وزیر مملکت برائے خارجہ امور حنا ربانی کھر ترقی، تجارت اور موسمیاتی تبدیلی میں سیاسی مشغولیت اور تعاون پر تبادلہ خیال کے لیے وزارتی سطح پرملاقاتیں کریں گی۔

دورے کے دوران وزیر مملکت وہاں کے قانون سازوں اور مقامی تاجروں سے بھی ملاقات کریں گی۔ بیلجئم میں اپنے دورے کے دوران حنا ربانی کھر یورپی پارلیمنٹ کے اراکین اور یورپی کمیشن کے سینئر حکام سے بھی ملاقاتیں کریں گی۔

سوناکشی سنہا نے 2 جون کو اپنی 36 ویں سالگرہ منائی اور انہیں اپنے والد، تجربہ کار اداکار اور سیاست دان شتروگھن سنہا کی جانب سے سالگرہ کی پرتپاک مبارکبادیں موصول ہوئیں۔

انہوں نے سوناکشی کے بچپن کی یادوں سے لے کر ان کے خاندانی البم میں محفوظ کیے گئے لمحات تک کی تھرو بیک تصویروں کا ایک سلسلہ شیئر کرکے اس دن کو مزید خاص بنا دیا۔

یہ قیاس آرائیاں عروج پر ہیں کہ اداکارہ ان سے کچھ سالوں سے ڈیٹنگ کر رہی ہیں۔ پچھلے سال بھی، نوٹ بک اداکار نے انسٹاگرام پر سوناکشی کے ساتھ چند ویڈیوز اور ایک تصویر پوسٹ کی تھی اور لکھا تھا کہ وہ ان سے پیار کرتے ہیں۔ انہوں نے انسٹاگرام پر تصاویر کا ایک گروپ شیئر کیا اور انہیں سالگرہ کی مبارکباد دی۔

#ZaheerIqbal Confirms Relationship With #SonakshiSinha On Her Birthday, Says ‘I Love You’https://t.co/k9jlYhpbiA

— News18 Showsha (@News18Showsha) June 2, 2023

اسلام آباد: ملک کے تجارتی خسارہ میں جاری مالی سال کے 11 ماہ میں سالانہ بنیادوں  پر41  فیصد اورمئی میں 49 فیصدکی نمایاں کمی ریکارڈکی گئی ہے۔

جاری مالی سال کے دوران ملکی برآمدات میں سالانہ بنیادوں پر12 فیصد جبکہ درآمدات میں 29 فیصدکی نمایاں کمی ہوئی ہے۔ پاکستان بیوروبرائے شماریات کی جانب سے اس حوالہ سے جاری کردہ اعدادوشمار کے مطابق جولائی 2022 سے لیکر مئی 2023 تک تجارتی خسارہ کاحجم 25.79 ارب ڈالرریکارڈکیاگیا جو گزشتہ مالی سال کی اسی مدت کے مقابلہ میں 41 فیصدکم ہے،

گزشتہ مالی سال کی اسی مدت میں تجارتی خسارہ کاحجم 43.40 ارب ڈالر ریکارڈ کیا گیا تھا، مئی 2023 میں 2.089 ارب ڈالر کا تجارتی خسارہ ہوا جو گزشتہ سال مئی کے مقابلہ میں 49 فیصدکم ہے، گزشتہ سال مئی میں تجارتی خسارہ کاحجم 4.136 ارب ڈالر ریکارڈ کیا گی اتھا۔

اپریل کے مقابلہ میں مئی میں تجارتی خسارہ میں ماہانہ بنیادوں پراضافہ دیکھنے میں آیا ہے۔ اعدادوشمار کے مطابق جاری مالی سال کے پہلے 11 ماہ میں ملکی برآمدات کاحجم 25.36 ارب ڈالر ریکارڈ کیا گیا جو گزشتہ مالی سال کی اسی مدت کے مقابلہ میں 12 فیصدکم ہے، گزشتہ مالی سال کی اسی مدت میں برآمدات سے ملک کو28.87 ارب ڈالر کا زرمبادلہ حاصل ہوا تھا۔