اسلام آباد؛ بہارہ کہو کے علاقہ میں 2 گروپوں  کے درمیان فائرنگ، 4 افراد جاں بحق

تفصیلات کے مطابق تھانہ بہارہ کہو کے علاقہ سری چوک میں 2 گروپوں  کے درمیان فائرنگ کا واقعہ پیش آیا ہے، پولیس کا کہنا ہے کہ جھگڑے میں 4 افراد جاں بحق اور ایک زخمی ہے، پولیس نے موقع پر پہنچ کر تحقیات شروع کر دیں،  لڑائی کا واقعہ دشمنی کے باعث پیش آیا ہے۔

پولیس کے مطابق جاں بحق ہونیوالوں کی لاشیں پولی کلینک ہسپتال منتقل کردی گئیں ہیں ،پولی کلینک ہسپتال کی ایمرجنسی کوعام لوگوں کیلئے بندکردیا گیا، پولیس کی بھاری نفری پولی کلینک کے باہر بھی تعینات کردی گئی ہے۔

تھانہ بھارہ کہو کے علاقہ میں فائرنگ کے واقعہ پر آئی جی اسلام آباد محمد احسن یونس  نے نوٹس لے لیا ہے، ڈی آئی جی آپریشنز، ایس ایس پی آپریشنز کو خود موقع پر پہنچنے کی ہدایت کردی ۔آئی جی نے  واقعہ میں ملوث ملزمان کو فوری گرفتار کرنے کی  بھی ہدایت کی۔

ترجمان پولیس کا کہنا ہے کہ  ابتدائی تحقیقات کے مطابق فائرنگ کا واقعہ دوگروپوں کے درمیان سابقہ دشمنی کی بناء پرپیش آیا، فائرنگ سے چار افراد جاں بحق، ایک زخمی ہوئے ہیں،ڈی آئی جی آپریشنز، ایس ایس پی آپریشنز، ایس پی سٹی بھاری نفری کے ہمراہ موقع پر پہنچ گئے، ملزمان کی شناخت کرلی گئی ہے جن کی گرفتاری کے لئے علاقہ میں سرچ آپریشن جاری ہے۔