تحریک انصاف  کا کل لاہور میں گورنر ہاؤس کے سامنے احتجاج کا اعلان

تفصیلات کے مطابق لاہور میں پی ٹی آئی رہنما فواد چوہدری کے ہمراہ میڈیا سے بات کرتےہوئے حماد اظہر نے کہا کہ پنجاب اسمبلی کو ماورائے آئین مذاق بنانے کی کوشش کی جارہی ہے، پاکستان تحریک انصاف کے مینڈیٹ کی توہین کرنے کی کوشش کی جارہی ہے۔

ان کاکہنا تھا کہ جمعرات کو گورنر ہاؤس کے باہر بھرپور احتجاج کیا جائے گا اور پارٹی چیئرمین عمران خان کا اہم خطاب ہو گا،  کل اہلیان لاہور 5 بجے گورنر ہاؤس کے سامنے پہنچیں۔

سابق وفاقی وزیر فواد چودھری نے کہا کہ پنجاب میں سیاسی صورتحال بدل رہی ہے اور مسلم لیگ ق کے ارکان نے پرویز الہیٰ پر اعتماد کا اظہار کیا ہے،  وزیراعلیٰ پرویزالہیٰ اور اسپیکر سبطین خان کو 187 ارکان کی حمایت حاصل ہے۔

انہوں نے کہا کہ آصف علی زرداری کی جانب سے خواتین اراکین کو پیسوں کی آفر کی گئی ہے، گورنر عدم اعتماد کے لیے کم سے کم 10 روز کا وقت دینے کا پابند ہے اور خیبر پختونخوا اسمبلی کا مقدر پنجاب اسمبلی سے جڑا ہے۔ پنجاب اسمبلی تحلیل ہونے کے بعد خیبر پختونخوا اسمبلی تحلیل کی جائےگی۔

فواد چودھری نے کہا کہ آئین بڑا واضح ہے اور اسپیکر نے رولنگ دی ہے لیکن اگر انہیں اسپیکر کی رولنگ پسند نہیں تو وہ کورٹ میں جا کر چیلنج کریں۔ اگر اسپیکر پنجاب اسمبلی نے صدر کو خط لکھا ہے تو گورنر کو ہٹایا بھی جاسکتا ہے۔

انہوں نے کہا کہ غیر آئینی اقدام پر گورنر پر آرٹیکل 6 بھی لگ سکتا ہے اور نمبرز ہم نے نہیں بلکہ انہوں نے پورے کرنے ہیں،  آصف زرداری سندھ کا پیسہ پنجاب میں خریدوفروخت پر لگا رہا ہے اس لیے آصف زرداری کے پنجاب میں داخلے پر پابندی لگانی چاہیے۔