پاکستان کو امریکا یا چین میں سے کسی ایک کو چُننے کا نہ کہا جائے: حنا ربانی

امریکی اخبار کو انٹرویو میں حنا ربانی کھر نے کہا کہ امریکا چین تنازع کے اثرات کے بارے میں پاکستان فکرمند ہے، دنیا کو دو بلاکوں میں تقسیم کرنے کے تصور سے ہمیں خطرہ ہے، دنیا کو مزید تقسیم کرنے والی کوئی بھی چیز قابلِ تشویش ہے۔

انہوں نے کہا کہ ہماری امریکا کے ساتھ قریبی تعاون کی تاریخ ہے جسے چھوڑنے کا ہمارا کوئی ارادہ نہیں، چین کے ساتھ ہمیشہ سے ہمارا قریبی تعاون بھی ایک حقیقت ہے اور چین پاکستان کے لیے سب سے بڑا سیلنگ پوائنٹ ہے جو بہت بڑی آبادی کو غربت سے نکالنے کا ایک معاشی ماڈل ہے۔

ان کا کہنا تھاکہ پاکستان کو امریکا یا چین میں سے کسی ایک کو چُننے کا نہ کہا جائے، واشنگٹن اور بیجنگ کے درمیان بڑھتی ہوئی دشمنی میں پاکستان کسی ایک فریق کو چُننے کی خواہش نہیں رکھتا۔

حنا ربانی کھر نے کہا ہے کہ میرا نہیں خیال مغرب کےقیادتی کردارکو کوئی خطرہ ہے، مغرب کے نظریات اور سافٹ پاور کی اہمیت برقرار ہے۔

ان کا کہنا تھاکہ افغانستان کے حالات پاکستان کے لیے سکیورٹی مسائل بڑھا رہے ہیں،  افغانستان سے متعلق امریکی پالیسی کا الٹا اثر ہو رہا ہے، خطے میں سیاسی، معاشی بہتری کےلیے پاکستان اور افغان طالبان سے سفارتی طریقے سے ڈیل کر رہا ہے، جارحیت اور دھمکی سے صورتحال مزید خراب ہوتی ہے۔

وزیر مملکت نے کہا ہے کہ مشکل ترین حالات میں بھی ہم سفارتی راستہ ہی اختیار کرنےکی کوشش کریں گے، دہشتگردی کے خاتمے کےلیے امریکا، چین کسی کی جانب سے بھی فوجی مداخلت کو ترجیح نہیں دیں گے۔