تحریک انصاف کا ٹکٹ ملا تو ضرور انتخابات لڑوں گا،اسد عمر

پاکستان تحریک انصاف (پی ٹی آئی) کے سابق رہنما اور سابق وفاقی وزیر اسد عمر نے کہا ہے کہ تحریک انصاف کا ٹکٹ ملا تو ضرور انتخابات لڑیں گے۔

اسد عمر نے کہا کہ آئین کے اندر انتخابات کروانے کا لکھا ہوا ہے، پی ٹی آئی کی انتخابات کیلئے تیاری مکمل ہے۔ تمام انتخابات میں اعتراضات اٹھائے گئے ہیں۔ الیکشن کمیشن کو انتخابات پر اعتماد کا ماحول بنانا پڑے گا جس پر تمام پارٹیوں کو اعتماد ہو اور عوام کو بھی اعتماد ہو ورنہ پاکستان میں پہلے جو الیکشنز کے بعد مسائل پیدا ہوتے تھے اب بھی وہی ہو گا۔

خیال رہے کہ اس سے قبل سابق وفاقی وزیر فواد چودھری نے بھی اپنے ایک بیان میں واضح کیا تھا کہ اگر الیکشن ہوئے تو جہلم سے قومی اور صوبائی اسمبلی کے الیکشن لڑوں گا۔

دوسری طرف پی ٹی آئی کے سابق رہنما کو آج تھانہ مارگلہ میں درج مقدمے پر سیشن کورٹ اسلام آباد کی طرف سے جوڈیشل کمپلیکس پیش ہونے کا حکم دیا گیا ہے۔ عدالت نے اسد عمر سمیت دیگر ملزمان کو بھی جوڈیشل کمپلکس پیش ہونے کی ہدایت کی ہے۔