الیکشن نئی مردم شماری کے ساتھ ہونے چاہییں ،پرانی مردم شماری کے ساتھ الیکشن ہر گز قبول نہیں ،ایم کیوایم

کراچی میں ایم کیوایم  رہنماؤں کے ہمراہ پریس کانفرنس کرتے ہوئے خالد مقبول صدیقی نے کہا کہ اگست میں اسمبلیوں کی مدت ختم ہوجائے گی  اور مردم شماری ہمارے بنیادی مطالبات میں سے ایک مطالبہ ہے۔

وزیر داخلہ رانا ثنا اللہ خان نے ہفتے کو پریس کانفرنس کرتے ہوئے  کہا تھا کہ آئندہ الیکشن پرانی مردم شماری کے تحتہی  ہوں گے کیونکہ نئی مردم شماری پر اعتبار نہیں کر سکتے اس میں بہت زیادہ مسائل ہیں  اور اس نئی مردم شماری سے ایم کیو ایم سب سے زیادہ غیر مطمئن ہے۔

جس پر بات کرتے ہوئے خالد مقبول صدیقی نے کہا  ’چونکہ ابھی نتائج کا اعلان نہیں ہوا تو ہم یہ امید رکھتے ہیں کہ کراچی کو کسی قدر انصاف فراہم کیا جائے گا کیونکہ تین کروڑ آبادی کا شہر شفاف مردم شماری کا متحمل ہے۔‘

ان کا مزید کہنا تھا  کہ ’کراچی کی آبادی کو ایک کروڑ 60 لاکھ سے کم کر کے ایک کروڑ 40 لاکھ کرنے کی سازش مکمل کرلی گئی تھی۔ ایم کیو ایم نے جوبھی  مقدمات لڑے تھے  اس کے بعد میگا سٹی کو دریافت تو کروا لیاتھا۔ ہم اس آبادی سے کم کسی بھی مردم شماری کے نتائج کو قبول نہیں کرسکتے۔

الیکشن کمیشن کے بعض افسران پر الزام عائد کرتے ہوئے خالد مقبول صدیقی کا  مزید کہنا تھا کہ ’الیکشن کمیشن سے تعلق رکھنے والے متعصب لوگوں نے ووٹر لسٹوں کو خراب کیا، ہم الیکشن کمیشن سے مطالبہ کرتے ہیں کہ جلد سے جلد ووٹر لسٹوں سے خرابی کو دورکیا جائے۔ ہم پاکستان میں جلد سے جلد انتخابات کروانے کے خواہش مند ہیں۔ ہم غیر جانبدار انتخابات کو ہی مانیں گے۔

انتخابات وقت پر ہوں اور نئی مردم شماری، نئی حلقہ بندیوں اور نئی ووٹر لسٹوں کے ساتھ ہونے چاہییں۔