دریائوں میں پانی کے بہائو میں کمی سے صورت حال نارمل ہو رہی ہے، این ای او سی

اسلام آباد: ملک میں جاری حالیہ بارشوں کے سلسلے میں کمی واقع ہوئی ہے جس سے دریائوں میں پانی کا بہائو بھی کم ہوا ہے۔

نیشنل ایمرجنسی آپریشنز سینٹر (این ای او سی) کی جانب سے جمعہ کی صبح جاری تازہ ترین اپڈیٹ کے مطابق دریائے چناب، راوی اور کابل میں پانی کا بہاؤ کمی کے ساتھ مستحکم ہونے کی عکاسی کر رہا ہےجبکہ مشرقی دریا میں بھی پانی کا اخراج مستحکم ہوا ہے دریائے سندھ اور تربیلا پر بھی پانی کا بہاؤ نچلی سطح پر ریکارڈ کیا گیا ہے، مجموعی طور پر صورتحال نارمل ہے۔

دریں اثنا این ڈی ایم اے نے متعلقہ اداروں کو ہدایت کی ہے کہ بارش کے دوران سیلابی خطرے سے دوچار علاقوں میں نکاسی آب کے نظام کو فعال بنایا جائے۔ممکنہ خطرے سے دوچار نشیبی علاقوں سے بوقت ضرورت لوگوں کا بروقت انخلا یقینی بنائیں۔

سیلابی صورتحال سے نمٹنے کیلئے مطلوبہ ایمرجنسی عملہ و مشینری تیار رکھیں۔متعلقہ صوبائی ادارے عوام کو متوقع صورتحال سے باخبر رکھنے کیلئے تمام میڈیا اور لوکل پلیٹ فارمز کے ذریعے تازہ معلومات فراہم کرتے رہیں۔