فافن نے این اے 249 کراچی کے انتخابات کی رپورٹ جاری کردی

فافن نے این اے 249 کراچی کے انتخابات کی رپورٹ جاری کر دی،  این اے 249 میں ووٹرز کا ٹرن آوٹ 21.6 فیصد رہا  ہے۔ این اے 249 میں عام انتخابات میں ٹرن آوٹ 40 فیصدتھا۔

فافن رپورٹ  کے مطابق  98 پولنگ اسٹیشنز کے باہر ووٹرز نے انتخابی عمل کو تسلی بخش قرار دیا، این اے 249 میں خلاف ورزیوں کے 149 واقعات مشاہدہ کیے گئے ہیں۔ خلاف ورزیوں کے 149 واقعات میں سے 11 واقعات سنگین نوعیت کے تھے۔

فافن رپورٹ میں کہا گیا ہے  کہ  سنگین خلاف ورزیوں کے 11 واقعات میں پولنگ اسٹاف کی جانب سے ووٹرز کو ووٹ ڈالنے سے روک کر گھر بھیجے جانے کا مشاہدہ سامنے آیا۔

واضح رہے کہ کراچی سے قومی اسمبلی کے حلقے این اے 249 کے ضمنی الیکشن میں پیپلزپارٹی کے امیدوار قادر خان مندوخیل 16156 ووٹ لے کر کامیاب ہوئے  (ن) لیگ کے مفتاح اسماعیل 15473 ووٹ لے کر دوسرے نمبر پر رہے۔

خیال رہے کہ ن لیگ کے امیدوار مفتاح اسماعیل نے کراچی کے قومی اسمبلی کے حلقے این اے 249 کے انتخابی نتائج کو چیلنج کردیا ہے۔