عدالت نے ’نو ہیلمٹ نو فیول‘ نوٹیفکیشن کے خلاف تحریری حکم جاری کردیا

لاہور: لاہور ہائی کورٹ نے موٹر سائیکل سواروں کے بغیر ہیلمٹ پیٹرول کی فروخت پر پابندی کے خلاف درخواست پر تحریری حکم نامہ جاری کردیا۔

تفصیلات کے مطابق جسٹس راحیل کامران شیخ نے شہری کی درخواست پر عبوری حکم جاری کیا۔ ڈپٹی کمشنر سمیت دیگر فریقین آئندہ سماعت پر تفصیلی جواب جمع کرائیں۔

درخواست گزار کے مطابق ہیلمٹ کے بغیر پیٹرول کی فراہمی پر پابندی کا نوٹیفکیشن غیر قانونی ہے۔ درخواست دائر کرنے کی وجوہات کے حق میں ہائیکورٹ کا فیصلہ بھی جمع کرا دیا گیا ہے۔

اگلی سماعت تک ہیلمٹ کے بغیر پیٹرول کی فراہمی پر پابندی کا نوٹیفکیشن معطل رہے گا۔ عدالت نے درخواست پر مزید کارروائی 16 اگست تک ملتوی کر دی۔

اس سے قبل (کل) جمعہ کو لاہور ہائی کورٹ نے ہیلمٹ کے بغیر پیٹرول کی فروخت پر پابندی کا نوٹیفکیشن معطل کردیا۔

جسٹس راحیل کامران شیخ نے شہری عرفان بشیر کی درخواست پر سماعت کی۔ عدالت نے پابندی کا نوٹیفکیشن معطل کرتے ہوئے وفاقی حکومت اور دیگر کو نوٹس جاری کرتے ہوئے جواب طلب کر لیا۔

عدالت نے کہا کہ یہ پابندی محض نوٹیفکیشن سے کیسے لگائی جا سکتی ہے، ایسا کرنا بنیادی حقوق سے انکار ہے۔ مناسب ہے کہ حکومت اس سلسلے میں قانون سازی کرے۔