سکیورٹی فورسز کا گوادر اور باجوڑ میں آپریشن

باجوڑ اور گوادر میں سیکیورٹی فورسز کے آپریشن کے دوران دہشت گردوں اور سیکورٹی فورسز میں فائرنگ کا تبادلہ، 5 دہشت گرد ہلاک، تین زخمی اور ایک دہشت گرد کو زندہ گرفتار کرلیا گیا۔

پاک فوج کے شعبہ تعلقات عامہ (آئی ایس پی آر) کے مطابق چارمنگ باجوڑ میں انٹیلی جنس بیسڈ آپریشن کے دوران دہشت گردوں کی جانب سے سیکیورٹی فورسز پر فائرنگ کردی، فائرنگ کے تبادلے میں 4 دہشت گرد ہلاک، اور ایک دہشت گرد کو زندہ پکڑ لیا گیا۔ جب کہ فائرنگ کے تبادلے میں سپاہی محمد شعیب بہادری سے لڑتے شہید ہوگئے۔

آئی ایس پی آر نے بتایا کہ آپریشن دہشتگردوں کی موجودگی کی اطلاع پر 12 اور 13 اگست کی رات کو کیا گیا تھا، پریشن میں اسلحہ، گولہ بارود اور خود کش جیکٹس بھی برآمد کی گئی ہیں۔

دوسری جانب گوادر میں دہشت گردوں کی موجودگی کی اطلاع پر سیکیورٹی فورسز نے آپریشن کیا، اس دوران دہشت گردوں نے فائرنگ شروع کردی، اور سیکورٹی فورسز سے فائرنگ کے تبادلے میں ایک دہشت گرد ہلاک ہوگیا۔

فائرنگ کے تبادلے میں تین دہشت گرد زخمی بھی ہوئے ہیں، اور فائرنگ کا سلسلہ تاحال جاری ہے، جب کہ سیکیورٹی فورسز نے علاقے کو گھیرے میں لے لیا ہے۔

واضح رہے کہ جمعے کے روز بھی سیکیورٹی فورسز نے بلوچستان کے ضلع کیچ کے علاقے مزبند کے پہاڑی سلسلے میں دہشت گردوں کے خلاف کامیاب انٹیلی جنس بیسڈ آپریشن کیا، آپریشن کے دوران 2 دہشت گرد مارے گئے جبکہ ایک دہشت گرد زخمی ہوا، جسے گرفتار کرلیا گیا