الیکشن کمیشن اور سپریم کورٹ سے مطالبہ کرتے ہیں کہ الیکشن وقت پر ہوں، چیئرمین پی ٹی آئی

پریس کانفرنس کرتے ہوئے چیئرمین پی ٹی آئی گوہر علی خان کا کہنا تھا کہ لاہورہائی کورٹ کا فیصلہ الیکشن میں التوا کا جواز نہیں ہے، ڈسٹرکٹ افسران کو آر او نہیں بنایا جا سکتا، اس سے دھاندلی ہو سکتی ہے، الیکشن کمیشن کے آر او از سے متعلق نوٹیفکیشن سے الیکشن ملتوی ہونے کا خدشہ ہے۔

چیئرمین پی ٹی آئی بیرسٹر گو ہر علی خان کا کہنا تھا کہ ہمارا مطالبہ پہلے سے یہی تھا کہ جوڈیشل مجسٹریٹ تعینات کیے جائیں، ہم الیکشن کمیشن اور سپریم کورٹ سے مطالبہ کرتے ہیں کہ الیکشن وقت پر ہوں۔

انہوں نے کہا کہ الیکشن کمیشن نے پہلے بھی انتخابات ملتوی ہونے کا بہانہ بنایا، الیکشن کمیشن کے مطابق 8 فروری کو انتخابات ہونے ہیں، سپریم کورٹ کی واضح ہدایت ہے کہ 8 فروری کوالیکشن ہونے چاہئیں، الیکشن کمیشن اور صدر پاکستان کے درمیان الیکشن کروانے کا معاہدہ موجود ہے۔