الیکشن 2024، ملک بھر میں 90 ہزار 675 پولنگ اسٹیشنز قائم

8 فروری کو ہونیوالے عام انتخابات کیلئے الیکشن کمیشن کی جانب سے ملک بھر میں 90 ہزار 675 پولنگ اسٹیشنز قائم کئے گئے ہیں۔

الیکشن کمیشن کے مطابق مردوں کیلئے 25 ہزار 320، خواتین کیلئے 23 ہزار 952 پولنگ اسٹیشنز قائم کئے گئے ہیں جبکہ ملک بھر میں مردوں اور خواتین کیلئے مشترکہ پولنگ اسٹیشنز کی تعداد 41 ہزار 403 ہے۔

الیکشن کمیشن کے مطابق  صوبہ پنجاب میں رجسٹرڈ ووٹرز کی کل تعداد 7 کروڑ 32 لاکھ 7 ہزار 896  ہے جس کے تحت مجموعی طور پر 50 ہزار 944 پولنگ اسٹیشنز قائم کئے گئے ہیں، پنجاب میں مردوں کیلئے 14 ہزار 556، خواتین کیلئے 14 ہزار 36 پولنگ اسٹیشنز قائم کئے گئے ہیں جبکہ صوبے میں مردوں اور خواتین کیلئے مشترکہ پولنگ اسٹیشنز کی تعداد 22 ہزار 352 ہے۔

الیکشن کمیشن کے مطابق سندھ میں  سندھ میں ووٹرز کی تعداد 2 کروڑ 69 لاکھ 94 ہزار 769 ہے جس کے تحت مجموعی طور پر 19 ہزار 6 پولنگ اسٹیشنز قائم کئے گئے ہیں، سندھ میں مردوں کیلئے 4 ہزار 443، خواتین کیلئے 4 ہزار 313 پولنگ اسٹیشنز قائم کئے گئے ہیں۔ سندھ میں مردوں اور خواتین کیلئے مشترکہ پولنگ اسٹیشنز کی تعداد 10 ہزار 250 ہے۔

الیکشن کمیشن کے مطابق خیبرپختونخوا میں خیبر پختونخوا میں ووٹرز کی مجموعی تعداد 2 کروڑ 19 لاکھ 28 ہزار 119 ہے جس کے تحت مجموعی طور پر 15 ہزار 697 پولنگ اسٹیشنز قائم کئے گئے ہیں، خیبرپختونخوا میں مردوں کیلئے 4 ہزار 810 جبکہ خواتین کیلئے 4 ہزار 286 پولنگ اسٹیشنز بنائے گئے ہیں۔ خیبرپختونخوا میں مردوں اور خواتین کیلئے 6 ہزار 610 مشترکہ پولنگ اسٹیشنز قائم کئے گئے ہیں ۔

الیکشن کمیشن کے مطابق بلوچستان میں  بلوچستان میں ووٹرز کی تعداد 53 لاکھ 71 ہزار 947 ہے اور مجموعی طور پر 5 ہزار 28 پولنگ اسٹیشنز قائم کئے گئے ہیں، بلوچستان میں مردوں کیلئے ایک ہزار 511، خواتین کیلئے ایک ہزار 317 پولنگ اسٹیشنز قائم کئے گئے ہیں جبکہ مردوں اور خواتین کیلئے مشترکہ پولنگ اسٹیشنز کی تعداد 2 ہزار 200 ہے۔

واضح رہے کہ کل 8 فروری بروز جمعرات ملک بھر میں عام انتخابات ہورہے ہیں ، پولنگ کا عمل صبح 8 سے شام 5 بجے تک جاری رہے گا، پولنگ کے انتظامات مکمل کر لیے گئے ہیں۔