وزیراعلیٰ پنجاب کل راجن پور کا دورہ کریں گے

ترجمان کے مطابق دورہ راجن پور کے دوران وزیراعلیٰ پنجاب سردار عثمان بزدار راجن پور کے مختلف علاقوں کوہ ماڑی، کوٹ بہادر، کوٹ مٹھن اور جام پور کا دورہ کریں گے اور قبائلی عمائدین، پارٹی عہدیداران و کارکنان سے ملاقات کریں گے۔

وزیراعلیٰ عثمان بزدار کو ڈی جی کوہ سلیمان ڈویلپمنٹ اتھارٹی کو ہ ماڑی میں جاری ترقیاتی سکیموں کے بارے میں بریف کیا جائے گا جبکہ وزیراعلیٰ کوہ ماڑی میں معززین علاقہ سے ملاقات کریں گے۔اس کے علاوہ وزیراعلیٰ عثمان بزدار راجن پور کینال ریسٹ ہاؤس میں منتخب نمائندوں سے بھی ملاقات کریں گے جبکہ وزیراعلیٰ عثمان بزدار سردار فاروق امان اللہ خان دریشک کی رہائش گاہ بھی جائیں گے۔

ترجمان نے مزید کہا کہ دورہ راجن پور کے دوران وزیراعلیٰ عثمان بزدار کوٹ مٹھن میں حضرت خواجہ غلام فریدؒ کے مزار پر حاضری دیں گے اور پھولوں کی چادر چڑھائیں گے جبکہ وزیراعلیٰ عثمان بزدار جام پور میں تحصیل ہیڈکوارٹر ہسپتال کا دورہ کریں گے اور تحصیل ہیڈکوارٹر ہسپتال جام پورمیں بستروں کی تعداد میں اضافے کے منصوبے کا افتتاح کریں گے۔ اس کے علاوہ وزیراعلیٰ عثمان بزدار جام پور میں سردار محمد جعفر خان لغاری کی رہائش گاہ بھی جائیں گے۔