راولپنڈی میں کھیلے جا رہے تیسرے اور آخری ٹیسٹ میچ میں تیسرے دن انگلینڈ کی پوری ٹیم 112 رنز بنا کر آئوٹ ہو گئی، پاکستان کو جیتنے کیلئے 36 رنز کا ہدف ملا جسے پاکستان نے باآسانی ایک وکٹ کے نقصان پر پورا کر لیا۔

دوسرے روز کھیل کے اختتام پر انگلینڈ نے اپنی دوسری اننگز میں 3وکٹوں کے نقصان پر24رنز بنائے تھے،مگر پاکستان کی شاندار باؤلنگ کے سامنے انگلینڈ کی ٹیم ریت کی دیوار ثابت ہوئی اور اپنی دوسری انننگز میں صرف 112 رنز ہی بنا سکی۔

دوسری اننگز میں انگلینڈ کے کھلاڑی بین ڈکٹ 12 رنز،زیک کرالی دو رنز اوراولی پوپ صرف ایک رن بنا کرآوٹ ہوئے۔

پاکستان کی جانب سے دوسری اننگز میں نعمان نے چھ جبکہ ساجد خان نے چار کھلاڑیوں کو آئوٹ کیا۔ نعمان علی کی میچ میں مجموعی طور پر 9 وکٹیں جبکہ ساجد خان نے میچ میں مجموعی طور پر10 وکٹیں حاصل کیں۔

سعود شکیل کو شاندار سنچری کی بدولت میں آف دی میچ کے ایوارڈ سے نوازا گیا، جبکہ سیریز میں بہترین باؤلنگ کرنے والے ساجد خان کو پلئیر آف دی سیریز سے نوازا گیا۔

اس سے قبل تین ٹیسٹ میچوں کی سیریز ایک ایک سے برابر تھی،ملتان میں کھیلے گئے  پہلے ٹیسٹ میں انگلینڈ نے پاکستان کو ایک اننگز اور 47 رنز سے شکست دی تھی جبکہ دوسرے ٹیسٹ میں پاکستان نے  انگلینڈ کو 156 رنز سے شکست دی تھی۔

پاکستان نے انگلینڈ کے خلاف 8 سال بعد ٹیسٹ سیریز اپنے نام کی۔ اس سے قبل یواے ای میں 16-2015 میں تین ٹیسٹ کی سیریز میں پاکستان نے دو صفر سےکامیابی حاصل کی تھی۔

چیف جسٹس پاکستان یحییٰ آفریدی نے حلف اٹھانے کے بعد پریکٹس اینڈ پروسیجر کمیٹی کی نئی تشکیل کا نوٹیفکیشن کردیا۔

سینئرترین جج جسٹس منصورعلی شاہ اورجسٹس منیب اختراب کمیٹی کے ممبرہیں۔ کمیٹی میں 20 ستمبرکے آرڈیننس کے بعد تبدیلی کردی گئی تھی۔  چیف جسٹس یحیی آفریدی جوڈیشل کمیشن کے سربراہ ہوں گے۔

آئین کے مطابق جسٹس منصورعلی شاہ اور جسٹس منیب اختر بھی جوڈیشل کمشین کا حصہ ہونگے۔

جسٹس امین الدین خان کے ساتھ جسٹس جمال مندوخیل بھی کمیشن کا حصہ ہونگے۔ جوڈیشل کمیشن کے دیگر ارکان کیلئے وزارت قانون کے ذریعے پارلیمان سے نام مانگے جائیں گے۔

جوڈیشل کمشین کو فعال بنانے کیلئے ارکان پارلیمنٹ کے نام جلد منگوائے جائیں گے۔ ہائی کورٹس کے چیف جسٹس صاحبان میں سے دو سینئر ترین بھی کونسل کا حصہ ہونگے۔

ارکان قومی اسمبلی اورخاتون یا ٹیکنوکریٹ رکن کے نام اسپیکرقومی اسمبلی دیں گے۔ چیئرمین سینیٹ حکومت اوراپوزیشن کے نامزد کردہ سینیٹرز کے نام بھجوائیں گے۔

واضح رہے کہ سپریم کورٹ کے جج جسٹس یحییٰ آفریدی نے آج چیف جسٹس آف پاکستان کے عہدے کا حلف اٹھایا۔ صدرمملکت آصف زرداری نے ان سے چیف جسٹس پاکستان کے عہدے کا حلف لیا۔

دوسری طرف عدالتی ذرائع کا کہنا ہے کہ چیف جسٹس یحییٰ آفریدی کی جانب سے فل کورٹ میٹنگ بلائے جانے کا امکان ہے۔ سپریم کورٹ میں فل کورٹ میٹنگ 28 اکتوبرکو بلائے جانے کا امکان ہے۔ فل کورٹ اجلاس 28 اکتوبرکو مقدمات کی سماعت سے قبل ہوگا۔

آل پاکستان جیمز اینڈ جیولر ایسوسی ایشن کے مطابق ملک بھر میں سونے کی قیمت میں 2 ہزار روپے کا اضافہ ہوا ہے جس سے سونے کی نئی قیمت2 لاکھ 84 ہزار 300 روپے ہو گئی ہے۔

 جبکہ 10گرام سونے کی قیمت  میں 1 ہزار 714 روپے کا اضافہ ہوا جس کے بعد دس گرام سونا 2 لاکھ 43 ہزار 741 روپے کا ہو گیا۔

عالمی مارکیٹ میں سونے کی فی اونس قیمت 22 ڈالر کے اضافے  سے  2748 ڈالر ہو گئی ہے۔

واضح رہے کہ گزشتہ روز سونے کی قیمت میں  800 جبکہ اس سے ایک روز قبل 2300 روپے فی تولہ کمی دیکھنے میں آئی  تھی۔