سیکیورٹی فورسز کا خیبرپختونخوا کے مختلف علاقوں میں آپریشن : 13 خارجی دہشت گردہلاک

سیکیورٹی فورسز نے خیبرپختونخوا کے مختلف علاقوں میں آپریشن کے دوران 13 خارجی دہشت گردوں کو ہلاک کردیا۔

پاک فوج کے شعبہ تعلقات عامہ (آئی ایس پی آر) کے مطابق سیکیورٹی فورسز کی جانب سے ڈیرہ اسمٰعیل خان، وزیرستان، لکی مروت اور خیبر کے علاقوں میں آپریشن کیے گئے، دہشت گردوں کی موجودگی کی خفیہ اطلاع پر کارروائیاں کی گئی۔

آئی ایس پی آر نے بتایا کہ خیبرپختونخوا کے ضلع لکی مروت میں آپریشن کے دوران 2 خارجی دہشت گرد ہلاک ہوئے اور ایک خارجی دہشت گرد کو خیبر کے علاقے باغ میں آپریشن کے دوران ہلاک کیا گیا۔

پاک فوج کے ترجمان کا کہنا تھا کہ شمالی وزیرستان میں جھڑپوں کے دوران 5 خارجی دہشت گردوں کو ہلاک کیا گیا جب کہ ڈیرہ اسمٰعیل خان کے علاقے کولاچی میں آپریشن کے دوران 5 خارجی دہشت گرد مارے گئے۔