سینیٹر فیصل جاوید کو پشاور ایئرپورٹ پر سعودی عرب جانے سے روک دیا

تحریک انصاف کے سینیٹر فیصل جاوید کو پشاور ایئرپورٹ پر سعودی عرب جانے سے روک دیا گیا۔

میڈیا سے گفتگو کرتے ہوئے فیصل جاوید نے کہا کہ ہائیکورٹ نے مجھے عمرہ ادائیگی کی اجازت دی، ہائیکورٹ نے میرا نام پی این آئی ایل سے نکالنے کا حکم دیا، آج 3 بجے میری فلائٹ تھی، مجھے عمرہ پر جانے کی اجازت نہیں دی گئی۔

سینیٹر نے کہا کہ ایئرپورٹ پر میں نے پشاور ہائیکورٹ کا آرڈر دکھایا، ان کو بھی نہیں مانا، ایف آئی اے امیگریشن والوں نے عدالتی احکامات کی توہین کی ہے۔

پی ٹی آئی رہنما نے کہا کہ عدالت نے میرا نام لسٹ سے نکالنے کا حکم دیا، حکومت نے میرا نام لسٹ سے نہیں نکالا، عدالتی احکامات کے باوجود حکومت نے عمرہ پر جانے کی اجازت نہیں دی۔ 

رپورٹ کے مطابق فیصل جاوید کو سعودی عرب کی فلائٹ سے آف لوڈ کر دیا گیا، فیصل جاوید عمرہ کی ادائیگی کیلئے سعودی عرب جا رہے تھے۔