ہیپاٹائٹس کے پھیلاؤ کو روکنے کیلئے مربوط اقدامات کی ضرورت ہے، صدر مملکت

اسلام آباد: صدر مملکت آصف علی زرداری نے کہا ہے کہ  ہیپاٹائٹس کے پھیلاؤ کو روکنے کیلئے مربوط اقدامات کی ضرورت ہے۔

تفصیلات کے مطابق صدر مملکت نے ہیپاٹائٹس کے عالمی دن پر اپنے پیغام میں کہا کہ ہیپاٹائٹس کے پھیلاؤ کو روکنے کیلئے مربوط اقدامات کی ضرورت ہے، پاکستان میں ہیپاٹائٹس صحتِ عامہ کا سنگین مسئلہ ہے۔

اپنے بیان میں انہوں نےمزید کہا کہ تشخیص میں تاخیراور غیر مؤثر علاج ہیپاٹائٹس کے پھیلاؤ کی وجوہات ہیں، ملک کے دُور دراز علاقوں میں ویکسی نیشن اور علاج کی فراہمی ہونی چاہیے، خون کی محفوظ منتقلی کیلئےسخت نگرانی اور معیاری ضوابط اپنانا ہوں گے۔

آصف زرداری نے کہا کہ ہمیں ذمہ دار طبی طرزِ عمل اور حفظانِ صحت کی عادات کو فروغ دینا ہوگا، ریاستی ادارے، شعبۂ صحت اور سماجی طبقات کو ہیپاٹائٹس کے خلاف کام کرنا ہوگا۔

وزیراعظم شہباز شریف پیغام

وزیراعظم شہباز شریف نے ہیپاٹائٹس سے بچاؤ کے عالمی دن کے موقع پر کہا کہ یہ مرض ایک عالمی چیلنچ بن چکا ہے۔

وزیراعظم کا کہنا ہے کہ ہیپاٹائٹس کی شرح والے ممالک میں پاکستان بھی شامل ہے، بہت سے متاثرہ افراد تشخیص اور علاج کے بغیر رہ جاتے ہیں۔

وزیراعظم شہباز شریف نے پیغام میں کہا کہ حکومت نے ہیپاٹائٹس سی خاتمے کے لئے قومی پروگرام شروع کیا ہے۔

شہباز شریف نے اعلان کیا کہ 2030 تک ایک کروڑ 65 لاکھ افراد کی اسکریننگ ہوگی، مثبت کیسز کا حکومت کی جانب سے مفت علاج کیا جائے گا۔

شہباز شریف کا مزید کہنا ہے کہ آگاہی، بروقت تشخیص،علاج بیماری پر قابو پانے کا واحد راستہ ہے۔