وزیر دفاع کی قیادت میں پاکستان کا اعلیٰ سطحی وفد آج دوحہ میں طالبان کے ساتھ مذاکرات کرے گا،دفتر خارجہ

اسلام آباد: ترجمان دفتر خارجہ کا کہنا ہے کہ وزیر دفاع خواجہ آصف کی قیادت میں پاکستان کا اعلیٰ سطحی وفد آج قطر کے دارالحکومت دوحہ میں افغان طالبان کے ساتھ مذاکرات کرے گا۔

تفصیلات کے مطابق ترجمان نے بتایا کہ مذاکرات میں افغان سرزمین سے ہونے والی سرحد پار دہشت گردی پر بات ہوگی، پاک افغان سرحد پر امن و استحکام کی بحالی کے لیے فوری اقدامات پر بات ہوگی۔

ترجمان دفتر خارجہ کے مطابق  پاکستان کسی قسم کی کشیدگی نہیں چاہتا، تاہم افغان طالبان حکام سے توقع رکھتا ہے کہ وہ عالمی برادری سے کیے گئے اپنے وعدوں کا احترام کریں اور افغان طالبان دہشت گرد تنظیموں سے متعلق پاکستان کے خدشات دور کریں۔

ترجمان نے کہا کہ افغان طالبان ٹی ٹی پی اور بی ایل اے سمیت دیگر دہشتگرد گروپس کے خلاف قابل تصدیق کارروائی کریں، افغان طالبان پاکستان کے جائز سکیورٹی خدشات کو دور کریں۔

ترجمان دفتر خارجہ نے مزید کہا کہ پاکستان دونوں ممالک کے مابین تناؤ کے خاتمے کے لیے قطر کی مصالحتی کوششوں کو سراہتا ہےاور پاکستان امید رکھتا ہے کہ یہ مذاکرات خطے میں امن و استحکام کے فروغ میں مددگار ثابت ہوں گے۔

دوسری جانب، افغان حکومت کے ترجمان ذبیح اللہ مجاہد نے ایکس پر جاری بیان میں کہا کہ وزیرِ دفاع مولوی محمد یعقوب مجاہد کی قیادت میں افغان حکومت کا ایک وفد پاکستان کے ساتھ مذاکرات کے لیے قطر روانہ ہو گیا ہے۔