قومی ائیر لائن کی 5 سال بعد برطانیہ کے لیے پہلی اڑان

اسلام آباد: پاکستان انٹرنیشنل ایئرلائن (پی آئی اے) کا 5 سال بعد برطانیہ کے لیے فلائٹ آپریشن آج بحال ہوگا۔

تفصیلات کے مطابق پی آئی اے کی 5 سال بعد پہلی پرواز آج اسلام آباد سے 350 مسافروں کو لے کر مانچسٹر روانہ ہوگی، پہلی پرواز کی روانگی سے قبل ہی برطانیہ کیلئے تین ماہ کی ایڈوانس بکنگ کرائی جاچکی ہے۔

اس موقع پر دونوں ہوائی اڈوں پر تقریب ہوگی، وزیر ہوا بازی خواجہ آصف یورپی یونین اور برطانیہ کے سفیروں سمیت دیگر اعلیٰ حکام شریک ہوں گے۔

ترجمان پی آئی اے کے مطابق پہلے مرحلے میں اسلام آباد سے مانچسٹر کے لیے دو پروازیں ہفتہ وار چلائی جائیں گی، دوسرے مرحلے میں لاہور اور کراچی سے بھی پروازوں کا آغاز کیا جائے گا۔

واضح رہے کہ 24جون 2020 کو غلام سرور خان نے پائلٹ کی ڈگریوں سے متعلق قومی اسمبلی کے فورم پر بیان دیا تھا، جس پر یکم جولائی 2020 کو برطانیہ نے پی آئی اے پر پابندی عائد کردی تھی۔