پاکستان نے غزہ میں دیرپا امن کے حصول کیلئے امن بورڈ میں شمولیت کی دعوت قبول کرلی

پاکستان نے غزہ میں دیرپا امن کے حصول کے لیے امن بورڈ میں شمولیت کی دعوت قبول کر لی ہے۔

دفتر خارجہ کے مطابق، پاکستان اقوام متحدہ کی سلامتی کونسل کی قرارداد 2803 کے لائحہ عمل کے تحت غزہ امن منصوبے پر عمل درآمد کی حمایت کے لیے جاری کوششوں کے تحت امن بورڈ میں شمولیت کے فیصلے کا اعلان کرے گا۔

امریکہ کے صدر ڈونلڈ ٹرمپ کی جانب سے وزیراعظم شہباز شریف کو بورڈ میں شمولیت کی دعوت دی گئی۔

پاکستان امید کرتا ہے کہ اس طریقہ کار کی تشکیل کے ساتھ ہی مستقل جنگ بندی کے نفاذ، فلسطینیوں کے لیے انسانی امداد میں مزید اضافے اور غزہ کی تعمیر نو کے لیے ٹھوس اقدامات کیے جائیں گے۔

پاکستان یہ توقع بھی کرتا ہے کہ یہ کوششیں بین الاقوامی قانونی حمایت اور اقوام متحدہ کی متعلقہ قراردادوں کے مطابق ایک قابل اعتماد، مقررہ نظام الاوقات کے تحت سیاسی عمل کے ذریعے فلسطینی عوام کے حق خود ارادیت کے حصول کا باعث بنیں گی، جس کے نتیجے میں انیس سو سڑسٹھ سے پہلے کی سرحدوں پرمبنی فلسطین کی آزاداور خودمختارریاست کا قیام عمل میں آئے گا، جس کا دارلحکومت القدس الشریف ہو۔

دفتر خارجہ نے کہا کہ پاکستان ان اہداف کے حصول کے ساتھ ساتھ اپنے فلسطینی بھائیوں اور بہنوں کے مصائب کے خاتمے کے لیے غزہ امن بورڈ میں تعمیری کردار ادا کرنے کا خواہشمند ہے۔