اسحاق ڈار اور بنگلہ دیش کے وزیر خارجہ کے درمیان ٹیلیفونک رابطہ،دوطرفہ تعاون کے فروغ پر اتفاق

اسلام آباد: نائب وزیرِ اعظم و وزیر خارجہ محمد اسحاق ڈار کی بنگلہ دیش کے وزیرِ خارجہ ڈاکٹر خلیل الرحمٰن سے ٹیلیفونک گفتگو ہوئی جس میں باہمی دلچسپی کے امور پر تبادلہ خیال کیا گیا۔

تفصیلات کے مطابق نائب وزیرِ اعظم نے ڈاکٹر خلیل الرحمٰن کو حالیہ تقرری پر مبارکباد پیش کی اور نیک خواہشات کا اظہار کیا۔

گفتگو کے دوران دونوں رہنماؤں نے امن، استحکام اور خوشحالی کے مشترکہ وژن کے تحت پاکستان اور بنگلہ دیش کے درمیان دوطرفہ تعلقات کو مزید مضبوط بنانے کے عزم کا اعادہ کیا۔

اس موقع پر مختلف شعبوں میں تعاون بڑھانے اور کثیرالجہتی فورمز پر باہمی اشتراک کو وسعت دینے پر بھی اتفاق کیا گیا۔

دونوں وزرائے خارجہ نے اس امر پر زور دیا کہ پاکستان اور بنگلہ دیش کے عوام کے لیے مستقبل پر مبنی شراکت داری کو فروغ دینا وقت کی اہم ضرورت ہے، اور اس سلسلے میں قریبی رابطوں کو جاری رکھا جائے گا۔