پی ٹی آئی ارکان پارلیمنٹ کا سپریم کورٹ کے باہر احتجاج، اہلخانہ کی بانی سے ملاقات کا مطالبہ

اسلام آباد: پاکستان تحریک انصاف ( پی ٹی آئی ) کے ارکان پارلیمنٹ کاسپریم کورٹ کے باہر احتجاج جاری ہے جس میں ارکان پارلیمنٹ نے عمران خان کے مقدمات مقرراہلخانہ سے ملاقات کرانے کا مطالبہ کیا ہے۔

تفصیلات کے مطابق پی ٹی آئی کے ارکان پارلیمنٹ کے سپریم کورٹ کے باہر احتجاج میں اپوزیشن لیڈر سینیٹ علامہ ناصر عباس، سلمان اکرم راجہ، عامر ڈوگر، شفیع جان، محمد حسین، شاہد خٹک سمیت دیگر ارکان اسمبلی نے شرکت کی۔ احتجاج کے شرکاء نے عمران خان کے ذاتی معالجین سے معائنے کا بھی مطالبہ کیا۔

پی ٹی آئی کے جنرل سیکرٹری سلمان اکرم راجہ نے سپریم کورٹ کے باہر میڈیا سے گفتگو کرتے ہوئے کہا کہ چیف جسٹس کی وجہ سے عمران خان کی ان کے بیٹوں سے بات ہوئی، ایک سلمان صفدر کی رپورٹ ہے اور ایک سرکاری رپورٹ ہے، ہم کسی بھی سرکاری رپورٹ پر اعتبار نہیں کریں گے، عظمیٰ خان نے کہا کہ بانی کو ان کی جان کی پرواہ ہے۔

سلمان اکرم راجہ کا کہنا تھا کہ یہ وہ لمحہ نہیں کہ تحریک چلائیں یا مذاکرات کریں، چیف جسٹس سے ملاقات نہیں ہوسکی، دوبارہ جاکر کوشش کروں گا چیف جسٹس سے ملاقات ہو، عمران خان کی صرف آنکھ کا نہیں پورے جسم کا چیک اپ ہونا چاہیے، ہم قانون اخلاقیات کا دروازہ کھٹکھٹائیں گے، جوائنٹ سیشن میں احتجاج رجسٹر کرائیں گے۔

پی ٹی آئی کے جنرل سیکرٹری سلمان اکرم راجہ نے کہا کہ رجسٹرار سپریم کورٹ سے ملاقات نہیں ہوسکی ہے اور رجسٹرار کا نمبر بھی بند ہے، پارلیمنٹیرینز باہر دھرنا دیے انصاف کے منتظر ہیں،انہوں نے کہا کہ سپریم کورٹ کے باہر اس لیے جمع ہیں کہ ہمارے کیسز لگائے جائیں اور انصاف ملے۔

علاوزہ ازاںپی ٹی آئی رہنما علی محمد خان کا کہنا تھا کہ بانی پی ٹی آئی کو آنکھ کے علاج کے لیے اسپتال لے جایا جائے، سپریم کورٹ نے فرینڈ آف کورٹ مقرر کیا،کیا رپورٹ داخل دفترکرنے کے لیے تھی؟