مریم نواز نے صوبے میں پہلی مرتبہ مفت میت منتقلی سروس کے آغاز کی منظوری دے دی

لاہور: وزیراعلیٰ پنجاب مریم نواز شریف نے صوبے میں پہلی مرتبہ مفت میت منتقلی سروس کے آغاز کی منظوری دے دی ہےجس کے تحت میت کو سرکاری ہسپتال سے گھر تک مفت منتقل کرنے کے لیے ایمبولینس سہولت فراہم کی جائے گی۔

تفصیلات کے مطابق صوبائی وزیر صحت خواجہ عمران نذیر کے مطابق وزیراعلیٰ پنجاب مریم نوازشریف کی زیر صدارت خصوصی اجلاس ہوا، سیکرٹری ایمرجنسی سروسز ڈاکٹر رضوان نصیر نے بریفنگ دی۔

دوران اجلاس خواجہ عمران نذیر نے بتایا کہ وزیراعلیٰ پنجاب مریم نواز شریف نے میت کو ہسپتال سے گھر پہنچانے کیلئے ایمبولینس سروس شروع کرنے کی منظوری دے دی، اجلاس میں پرائیویٹ ایمبولینس سروس کو بھی ریگولائز کرنے پر اتفاق کیا گیا، پرائیویٹ ایمبولینس سروسز کے ریٹ بھی مقرر کرنے کی تجویز کا جائزہ لیا گیا۔

بریفنگ کے مطابق سرکاری ہسپتالوں اور ہر تحصیل کی سطح پر سرکاری وہیکل سروس شروع کرنے کے لیے جامع پلان طلب کیا جائے۔ منصوبے کے مطابق پنجاب کی ہر تحصیل میں ہسپتال سے گھر تک میت کی منتقلی کے لیے کم از کم ایک وین دستیاب ہوگی۔

حکام کے مطابق مرحوم کے اہل خانہ 1122 پر کال کر کے یا ہسپتال کے کاؤنٹر سے رابطہ کر کے مفت وین سروس حاصل کر سکیں گے۔ میت منتقلی سروس کی مانیٹرنگ سمارٹ مینجمنٹ سسٹم کے ذریعے کی جائے گی تاکہ شفافیت اور بروقت فراہمی کو یقینی بنایا جا سکے،اجلاس میں یہ بھی فیصلہ کیا گیا کہ میت کو ایک شہر سے دوسرے شہر منتقل کرنے کی سہولت بھی مفت فراہم کی جائے گی۔

 اس موقع پر پرائیویٹ ایمبولینس سروس کو بھی ریگولیٹ کرنے پر اتفاق کیا گیا جبکہ پرائیویٹ ایمبولینس سروسز کے کرایوں کے تعین کی تجویز کا بھی جائزہ لیا گیا۔