طالبان سے منسلک سوشل میڈیا اکاؤنٹس کی جانب سے جنوبی وزیرستان حملے کی جعلی ویڈیو پھیلانے کا انکشاف

اسلام آباد: وزارتِ اطلاعات و نشریات کے فیکٹ چیک کے مطابق افغان طالبان حکومت سے منسلک سوشل آئی ای اے اردو آفیشل نامی ایکس اکاؤنٹ نے ایک جعلی ویڈیو شیئر کی جس میں دعویٰ کیا گیا تھا کہ یہ جنوبی وزیرستان میں پاکستانی فورسز پر حملے کی فوٹیج ہے۔

تفصیلات کے مطابق فیکٹ چیک کے دوران مذکورہ ویڈیو دراصل عراق کے علاقے کردستان کی ہے جسے جھوٹا تاثر دیتے ہوئے جنوبی وزیرستان، پاکستان کی ویڈیو کے طور پر پیش کیا گیا۔

وزارت اطلاعات و نشریات کی جانب سے مزید بتایا گیا کہ یہی ویڈیو اس سے قبل بھارتی خفیہ ایجنسی را سے منسلک پروپیگنڈا اکاؤنٹ رئیل بابابنارس کی جانب سے بھی شیئر کی گئی تھی جس سے افغان طالبان حکومت اور بھارتی جعلی پروپیگنڈا نیٹ ورک کے درمیان گٹھ جوڑ کے واضح شواہد سامنے آتے ہیں۔

وزارت اطلاعات کے مطابق جب سوشل میڈیا صارفین نے ویڈیو کی اصل حقیقت کو بے نقاب کیا تو طالبان سے منسلک اکاؤنٹ نے خاموشی سے اپنی گمراہ کن پوسٹ حذف کر دی۔

علاوہ ازاں فیکٹ چیک میں کہا گیا ہے کہ یہ واقعہ دشمن پروپیگنڈا نیٹ ورکس کے درمیان رابطے کو ظاہر کرتا ہے، جہاں بیرون ملک کی غیر متعلقہ ویڈیوز کو پاکستان اور افغانستان کی سرحد سے متعلق جھوٹی کہانیاں گھڑنے کے لیے استعمال کیا جاتا ہے۔

بیان میں وزارت اطلاعات نے کہا ہے کہ سچ ہمیشہ جھوٹ پر غالب آتا ہے۔