امریکا کو بڑا دھچکا:برطانیہ، فرانس،جرمنی، جاپان اور آسٹریلیا کا ٹرمپ کی اپیل پر جہاز بھیجنے سے انکار

ویب ڈیسک: امریکی صدر ڈونلڈ ٹرمپ کو بڑا جھٹکا لگا ہے، مغربی ممالک برطانیہ،جرمنی،فرانس اور آسٹریلیا نے ٹرمپ کی اپیل پر اپنے جنگی جہاز بھیجنےسے انکار کر دیا ہے۔

غیر ملکی میڈیا رپورٹس کے مطابق برطانوی وزیر اعظم سر کئیر اسٹارمر نے کہا ہے کہ ہم گلف میں جنگ نہیں چاہتے، جنگ کی وجہ سے گیس، تیل اور فرٹیلائزر کی قیمتیں بڑھی ہیں، ہمارا مقصد اپنے ریجن کے لوگوں کو محفوظ کرنا ہے۔

انہوں نے زور دے کر کہا کہ برطانیہ ایران جنگ میں براہ راست شامل نہیں ہوگا، جنگ ختم ہونے کے بعد ایران کے ساتھ مذاکراتی معاہدہ ضرور ہوگا، عالمی برادری جنگ کے جلد حل کے لئے کوششیں جاری رکھے گی۔

برطانوی وزیراعظم نے کہا کہ سمندری آمدورفت کی بحالی کے لیے اتحادیوں کے ساتھ مل کر کام کر رہے ہیں، 92 ہزار برطانوی شہری مشرق وسطیٰ سے واپس آئے ہیں، مشرق وسطیٰ میں جاری جنگ کو فوری بند ہونا چاہئے، جنگ کا خاتمہ ہی ضروریات زندگی کی اشیا کی قیمتوں کو تیزی سے نیچے لانے کا راستہ ہے۔

ان کا مزید کہنا تھا کہ جنگ کو روسی صدر پیوٹن کے لئے فائدہ مند موقع نہیں بننے دیا جا سکتا، ہمیں اپنے دفاع کے لیے مثبت کردار ادا کرنا ہوگا،میں جلد یوکرین کے صدر سے ملاقات کروں گا۔

جرمنی 

علاوہ ازاں جرمن وزیر دفاع نے آبنائے ہرمز میں جنگی بحری جہاز بھیجنے سے انکار کر دیا۔

میڈیا رپورٹس کے مطابق جرمن وزیر خارجہ نے بتایا کہ آبنائے ہرمز میں پیدا ہونے والی صورتحال کے ذمہ دار عناصر کے خلاف پابندیوں کی حمایت کی جائے گی، نیٹو کا آبنائے ہرمز میں کوئی براہ راست کردار نظر نہیں آتا، امریکا اور اسرائیل کو اپنے اہداف واضح انداز میں بیان کرنے چاہئیں۔

جرمنی کے وزیر خارجہ نے کہا کہ لبنان کی صورتحال انتہائی تشویشناک ہو چکی ہے،جرمنی لبنان کے لیے 188 ملین یورو کا امدادی پیکج فراہم کرے گا۔

جاپان

اسی طرح امریکا کے معاشی اتحادی جاپان نے بھی آبنائے ہرمز میں اپنے بحری جہاز بھیجنے سے انکار کر دیا ہے۔

رپورٹس کے مطابق جاپانی حکمراں جماعت کے پالیسی چیف نے کہا کہ خطے میں بہت بڑی دہلیز پار ہوئی تبھی جاپانی بحری جہاز آبنائے ہرمز بھیجے جا سکیں گے۔

آسٹریلیا

آسٹریلیا نے بھی آبنائے ہرمز کھلوانے کے لیے بحری جہاز بھیجنے سے انکار کردیا، آسٹریلوی وزیر نے کہاکہ آسٹریلیا مشرق وسطیٰ کے مشن میں حصہ نہیں لے رہا۔

علاوہ ازاں جنوبی کوریا نے کہا ہے کہ ہم نے ٹرمپ کی اپیل پڑھ لی ہے، مشرق وسطیٰ کی صورت حال کا قریبی سے جائزہ لے رہے ہیں۔
واضح رہے کہ فرانس خطے میں اپنے بحری جہاز بھیجنے سے پہلے ہی انکار کر چکا ہے۔

دوسری جانب امریکا اسرائیل کے ایران اور لبنان پر حملے 16 ویں روز میں داخل ہو گئے، ایران نے بھی جواب میں 54 ویں لہر کا آغاز کرتے ہوئے سجیل میزائل برسا دیئے۔

جبکہ امریکا کے صدر ڈونلڈ ٹرمپ نے آبنائے ہرمز کھلوانے کے لیے چین سمیت دنیا بھر سے مدد کی اپیل کی تاہم کسی ملک نے ابھی بحری جہاز بھیجنے کا اعلان نہیں کیا۔

ایرانی وزیر خارجہ عباس عراقچی نے ٹرمپ کا دعویٰ رد کرتے ہوئے کہا ہے کہ ایران نے کسی سے مذاکرات کے لیے رابطہ نہیں کیا، ایران سعودی عرب پر حملوں میں ملوث نہیں، امریکا کے لوکس ڈرون ایرانی ڈرون شاہد کی نقل ہیں، وہی عرب ممالک کو نشانہ بنا رہے ہیں، امریکا نے ایرانی دعوے کی تردید کی ہے۔

بغدادمیں 10 امریکی فوجی ہلاک

علاوہ ازںبغداد میں امریکی سفارتخانے پر آج صبح حملہ کیا گیا،امریکی دفاعی نظام نے میزائل یا ڈرون کو فضا میں ہی تباہ کر دیا۔
ابھی یہ واضح نہیں ہو سکا کہ حملہ ڈرون سے کیا گیا یا میزائل مارا گیا۔

اس حوالے سے روسی ٹی وی کا کہنا ہے کہ حملے میں 10 امریکی فوجی ہلاک ہوگئے، وکٹوریہ بیس پر ڈرون حملے کے بعد آگ بھڑک اٹھی اور ابتدائی طور پر 5 افراد کے زخمی ہونے کی اطلاعات تھیں۔ عراقی مزاحمتی تنظیم نے گزشتہ روز بھی وکٹوریہ بیس پر ڈرون حملے کی ویڈیو جاری کی تھی۔

خیال رہے کہ مشرق وسطیٰ کی جنگ میں سولہ روز کے دوران 1444 ایرانی اور 850 لبنانی شہید ہو چکے ہیں جن میں بڑی تعداد میں بچے اور عورتیں شامل ہیں، ہزاروں افراد زخمی ہیں جبکہ ایران میں 36 ہزار رہائشی عمارتوں کو نشانہ بنایا جا چکا ہے۔