اسحا ق ڈار کا مصری و ازبک وزیر خارجہ سے ٹیلیفونک رابطہ، دو طرفہ اور علاقائی صورتحال پر گفتگو

اسلام آباد: نائب وزیراعظم و وزیرِ خارجہ محمد اسحاق ڈار نے مصر کے وزیر خارجہ ڈاکٹر بدر عبدالعاطی اور ازبکستان کے وزیر خارجہ بختیار سعیدوف سے ٹیلیفونک گفتگو کی ہے جس میں دو طرفہ امور اور علاقائی صورتحال پر تبادلہ خیال کیا گیا ہے۔

ترجمان دفتر خارجہ کے مطابق مصری وزیر خارجہ نے پاکستان اور چین کے خطے میں امن و استحکام کے لیے پانچ نکاتی مشترکہ لائحہ عمل کو سراہا ہے۔

ترجمان نے کے مطابق مصری وزیر خارجہ نے اسلام آباد میں 4 فریقی وزرائے خارجہ اجلاس کے موقع پر پرتپاک مہمان نوازی پر نائب وزیراعظم اسحاق ڈار کا شکریہ ادا کیا ہے۔

ٹیلیفونک رابطے میں دونوں رہنماؤں نے پاکستان اور مصر کے درمیان تعلقات کی توثیق کی اور قریبی رابطے میں رہنے پر اتفاق کیا۔

علاوہ ازاں ازبک وزیر خارجہ نے خطے میں امن کیلئے پاکستان کے کردار کا اعتراف کیا، اسلام آباد اجلاس کی میزبانی پر پاکستان کی تعریف کی۔

اس موقع پر پاکستان-چین پانچ نکاتی امن منصوبے کی مکمل حمایت کی گئی، خلیج و مشرق وسطیٰ میں استحکام کیلئے مشترکہ عزم کیا گیا۔
ترجمان دفتر خارجہ کے مطابق دونوں ممالک نے قریبی رابطہ برقرار رکھنے پر اتفاق کیا۔