اسحاق ڈار اورچینی وزیرخارجہ کا ٹیلیفونک رابطہ ،امریکہ،ایران مذاکرات پر تبادلہ خیال

اسلام آباد:وزیر خارجہ سینیٹر محمد اسحاق ڈار سے عوامی جمہوریہ چین کے وزیر خارجہ وانگ یی سے ٹیلیفونک رابطہ کیا جس میں اسلام آباد مذاکرات اور مشرق وسطیٰ میں جاری کشیدگی کے حوالے سے تبادلہ خیال ہوا۔

ترجمان دفتر خارجہ کے مطابق گفتگو کے دوران دونوں رہنماؤں نے حال ہی میں ہونے والے اسلام آباد مذاکرات اور امریکہ–ایران براہِ راست مذاکرات پر تبادلہ خیال کیا۔

ترجمان کے مطابق چینی وزیر خارجہ نے خطے میں امن اور استحکام کے فروغ کے لیے پاکستان کی کاوشوں کو سراہتے ہوئے نائب وزیر اعظم کو مبارکباد دی اور پاکستان کے تعمیری سفارتی کردار کے لیے چین کی مسلسل حمایت کا اعادہ کیا۔

ترجمان نے مزید بتایا کہ اس موقع پر اسحاق ڈار نے خطے میں امن کی بحالی کے لیے مکالمے اور سفارت کاری کو ترجیحی ذریعہ قرار دیتے ہوئے پاکستان کے عزم کا اعادہ کیا۔

ترجمان کے مطابق دونوں رہنماؤں نے اس بات پر زور دیا کہ مسائل کے حل کے لیے بات چیت اور سفارت کاری ہی واحد مؤثر راستہ ہے۔

گفتگو میں پاکستان–چین پانچ نکاتی امن اقدام پر بھی تبادلہ خیال کیا گیا، جس کا مقصد مسائل کے پرامن حل کو فروغ دینا ہے۔علاوہ ازیں دونوں ممالک نے باہمی رابطے برقرار رکھنے پر اتفاق بھی کیا۔