پنجاب کا گندم کےکاشتکاروں کو 6 ارب روپے کا باردانہ مفت دینے کا اعلان

لاہور: وزیراعلیٰ پنجاب مریم نواز نے گندم کے کاشتکاروں کو 6 ارب روپے کا باردانہ مفت دینے کا اعلان  کر دیا۔

رجسٹرڈ کاشتکاروں کو خریداری مراکز سے فی ایکڑ 10بوری باردانہ دیا جائے گا۔ وزیراعلیٰ نے کاشتکاروں سے 3500 روپے فی من گندم فوری خریدنے کی ہدایت بھی کر دی۔

وزیراعلیٰ پنجاب مریم نواز کی زیرِ صدارت اجلاس میں کسان کارڈ ہولڈرز سے ترجیحی بنیادوں پر گندم خریدنے کا اصولی فیصلہ کیا گیا۔

اجلاس میں  3500 روپےمن گندم خریدنے کے 72 گھنٹے کے اندر کاشتکاروں کو ادائیگی ضروری قرار دی گئی۔صوبائی اور ڈویژنل سطح پر اسٹریٹیجک مینجمنٹ کمیٹیاں بھی قائم کر دیں جو گندم خریداری کے امور کی مانیٹرنگ کریں گی۔

گندم کے کاشتکاروں کو6 ارب روپے کا باردانہ مفت۔

🔹وزیر اعلی مریم نواز کی 3500 روپے فی من گندم خریداری شروع کرنے کی ہدایت۔ pic.twitter.com/qJ3iAAvbO6

— PMLN (@pmln_org) April 14, 2026

وزیراعلیٰ نے ”ورک وِد پنجاب گورنمنٹ“پروگرام شروع کرنے کا بھی اعلان کیا اور کہا کہ ایگریکلچر گریجویٹس سمیت دیگر کو انٹرن شپ کے مواقع فراہم کیے جائیں گے۔

اجلاس میں   بتایا گیاکہ کسان کارڈ سے 100ارب روپے کے قرضوں کے اجراء کا ریکارڈ قائم ہوا ، 99 فیصد وصولی کا ریکارڈ بھی بن گیا۔کسان کارڈ کے ذریعے 9لاکھ کاشت کاروں کی رجسٹریشن ہوئی۔

وزیراعلیٰ مریم نواز نے رجسٹریشن جاری رکھنے کی ہدایت کی۔

اجلاس کو یہ بھی بتایا گیاکہ ڈسکہ میں ہارویسٹر کی مقامی سطح پر تیاری کے لیے لوکل مینوفیکچرز سرگرم عمل ہیں۔گرین ٹریکٹر اسکیم اور ایگریکلچر میکانائزیشن کی وجہ سے مقامی انڈسٹری فروغ پانے لگی ہے،گرین ٹریکٹر اسکیم کے تحت 30 ہزار ٹریکٹرز کا ہدف ہے، 20 ہزار ٹریکٹرز کاشتکاروں کو مل گئے، وزیراعلیٰ کے تاریخ ساز پراجیکٹس پر 88فیصد کسانوں نےاعتماد کا اظہار کیا ہے۔