مذاکرات صرف پاکستان میں ہی ہوں گے، کسی اور جگہ نہیں،ایران کا واضح پیغام 

اسلام آباد میں ایران کے سفیر رضا امیری مقدم نے واضح کیا ہے کہ مذاکرات صرف پاکستان میں ہی ہوں گے، کسی اور جگہ نہیں۔ ان کا کہنا تھا کہ "ہم پاکستان پر اعتماد کرتے ہیں، امریکا پر نہیں۔"

تفصیلات کے مطابق اسلام آباد میں پالیسی ریسرچ انسٹی ٹیوٹ میں خطاب کرتے ہوئے ایرانی سفیر نے پاکستان کو ایک قابلِ اعتماد اور غیر جانبدار ثالث قرار دیا اور اس کے سفارتی کردار اور امن کوششوں کو سراہا۔

دوران خطاب  ایرانی سفیر کا کہنا تھا کہ ایران خطے میں بالادستی نہیں بلکہ اپنی خودمختاری کا تحفظ چاہتا ہے اور اس کا جوہری پروگرام مکمل طور پر پُرامن ہے، جس کے خلاف کوئی ثبوت پیش نہیں کیا گیا جبکہ آئی اے ای اے بھی اس بات کی تصدیق کر چکا ہے۔

رضا امیری مقدم کے مطابق ایران 1979 کے انقلاب کے بعد سے مسلسل دباؤ کا سامنا کر رہا ہے، مگر تمام تر دباؤ کے باوجود ملک مضبوطی سے کھڑا ہے۔

انہوں نے اسرائیل پر خطے میں بالادستی کی خواہش اور امریکا پر اس کی حمایت کا الزام بھی عائد کیا اور کہا کہ مذاکرات کے دوران اچانک حملوں نے سفارتی عمل کو متاثر کیا، تاہم تمام تر جانی و مالی نقصانات کے باوجود ایران کی قوم متحد اور مضبوط ہے۔