ایران نے آبنائے ہرمزمکمل طور پر کھولنے کا اعلان کر دیا،تیل کی قیمتوں میں کمی کا امکان

تہران: ایران نے امریکہ و اسرائیل کے ساتھ حالیہ کشیدگی کے بعد بند آبنائے ہرمز کو مکمل طور پر کھولنے کا اعلان کر دیا۔

تفصیلات کے مطابق اس بات کا اعلان ایرانی وزیر خارجہ عباس عراقچی نے سوشل میڈیا ویب سائٹ ’’ایکس‘‘ پر کیا ۔  
ایکس پوسٹ میںوزیر خارجہ عباس عراقچی نے کہا کہ آبنائے ہرمز کمرشل شپنگ کے لیے مکمل طور پر کھول دی گئی، جنگ بندی کے دوران جہازوں کی آمدورفت جاری رہے گی۔

انہوں نے کہا کہ لبنان میں جنگ بندی کے تناظر میں آبنائے ہرمز سے تمام تجارتی بحری جہازوں کی آمد و رفت جنگ بندی کی باقی مدت کے لیے مکمل طور پر کھول رہے ہیں۔

ایرانی وزیر خارجہ نے کہا کہ یہ آمد و رفت اُس مربوط (کوآرڈینیٹڈ) راستے کے مطابق ہوگی جس کا اعلان پہلے ہی پورٹس اینڈ میری ٹائم آرگنائزیشن آف ایران کی جانب سے کیا جا چکا ہے، جو اسلامی جمہوریہ ایران کے تحت کام کرتی ہے۔

دوسری جانب ماہرین کا کہنا کہ ایران کے اس فیصلے کے بعد عالمی مارکیٹ میں تیل کی قیمتوں میں نمایاں کمی کا امکان ظاہر کیا جا رہاہے۔

خیال رہے کہ گزشتہ روز امریکی صدر ڈونلڈ ٹرمپ نے اعلان کیا تھا کہ لبنان اور اسرائیل کے درمیان 10 روزہ جنگ بندی پر اتفاق ہوگیا ہے۔

جبکہ اس سے قبل امریکی واسرائیلی جارحیت کے جواب میں ایران نےآبنائے ہرمز کو مکمل طور پر ہر قسم کی آمد ورفت کیلئے بند کر دیا۔