فیلڈ مارشل عاصم منیر، صومالی وزیر دفاع کا دفاعی روابط بڑھانے پر اتفاق

راولپنڈی: پاکستان اور صومالیہ نے مشترکہ سکیورٹی چیلنجز سے نمٹنے کے لیے فوجی تعاون کو مزید مضبوط بنانے اور استعدادِ کار میں اضافے کے اقدامات کو فروغ دینے کی ضرورت پر زور دیا ہے۔

پاک فوج کے شعبۂ تعلقاتِ عامہ (آئی ایس پی آر) کے مطابق یہ اتفاق رائے راولپنڈی میں چیف آف آرمی اسٹاف و چیف آف ڈیفنس فورسز فیلڈ مارشل سید عاصم منیر سے صومالیہ کے وزیر دفاع احمد معلم فقی کی قیادت میں اعلیٰ سطح کے وفد کی ملاقات کے دوران کیا گیا۔

ملاقات میں باہمی دلچسپی کے امور، علاقائی سلامتی کی صورتحال، دفاعی تعاون اور دوطرفہ سکیورٹی روابط کو مزید فروغ دینے سے متعلق مختلف پہلوؤں پر تفصیلی تبادلہ خیال کیا گیا۔

صومالی وزیر دفاع نے علاقائی امن و استحکام کے فروغ میں پاکستان کی مستقل حمایت اور پاک مسلح افواج کے پیشہ ورانہ کردار کو سراہتے ہوئے دونوں ممالک کے درمیان دفاعی تعاون کو مزید وسعت دینے کی خواہش کا اظہار کیا۔

اس موقع پر فیلڈ مارشل سید عاصم منیر نے صومالیہ کے سکیورٹی ڈھانچے کو مزید مضبوط بنانے اور خطے میں پائیدار امن و استحکام کے قیام کے لیے پاکستان کے مکمل تعاون کے عزم کا اعادہ کیا۔

ملاقات میں دونوں ممالک کے درمیان دفاعی تعاون، پیشہ ورانہ روابط اور مشترکہ سکیورٹی مفادات کو مزید مستحکم بنانے کے عزم کا بھی اظہار کیا گیا۔