قوم کل یوم آزادی ملی جوش و جذبے کے ساتھ منائے گی

لاہور: قوم کل یوم آزادی ملی جوش و جذبے اور اس عزم کی تجدید کے ساتھ منائے گی کہ مملکت بنانے کیلئے تحریک پاکستان کے جذبے سے کام کیا جائے گا۔

آج رات اسلام آباد میں یادگارِ فتح کے مقام پر یوم آزادی کی شاندار تقریب ہوگی۔

کل دن کا آغاز وفاقی دارالحکومت میں اکتیس اور صوبائی دارالحکومتوں میں اکیس اکیس توپوں کی سلامی سے ہوگا۔

نمازِ فجر کے بعد مساجد میں ملک کے امن، یکجہتی اور خوشحالی کیلئے خصوصی دعائیں کی جائیں گی۔

یوم آزادی کی تقریبات کا اہم پروگرام اسلام آباد میں قومی پرچم کشائی کی تقریب ہوگی۔

یوم آزادی کے موقع پر عمارتوں، سڑکوں، بازاروں اور عوامی مقامات کو قومی پرچموں، رنگا رنگ جھنڈیوں اور خوبصورت روشنیوں سے سجایا گیا ہے جس سے شہر اور قصبے انتہائی دلکش منظر پیش کر رہے ہیں۔

ریڈیو پاکستان یوم آزادی کے حوالے سے خصوصی پروگرام نشر کرے گا، جن میں تحریک پاکستان کے مشاہیر کی خدمات کو اجاگر اور قیامِ پاکستان یقینی بنانے کے لیے ان کی غیر معمولی خدمات کو خراج تحسین پیش کیا جائے گا۔