امریکہ کا جنگی جہاز چین کے سمندر میں گر کر تباہ

عالمی خبر رساں ادارے کے مطابق  امریکہ کے جنگی جہاز کو حادثہ اس وقت پیش آیا جب وہ لینڈنگ کر رہا تھا لیکن پائلٹ کمال مہارت کا ثبوت دیتے ہوئے جہاز سے نکلنے میں کامیاب ہو گیا۔

غیر ملکی ذرائع ابلاغ کے مطابق امریکی فوج نے اس ضمن میں کہا ہے کہ نیوی کا ایف 35 سی لائٹننگ ٹو جیٹ یو ایس ایس کارل ونسن کے عرشے پر اترتے ہوئے ٹکرایا جو حادثے کا سبب بنا۔

امریکہ کے ساتویں بیڑے کے ترجمان لیفٹیننٹ مارک لانگفورد کا کہنا ہے کہ جہاز سمندر میں گر گیا مگر پائلٹ کو  بچا لیا گیا ہے۔

 امریکی میڈیا کے مطابق امریکی بحریہ کا کہنا ہے کہ پائلٹ سمیت سات اہلکار اس حادثے میں زخمی ہوئے ہیں جن میں سے چار کو بحری جہاز پر طبی امداد دی گئی جبکہ تین کو فلپائن کے دارالحکومت منیلا کے فوجی اسپتال منتقل کیا گیا ہے۔

مارک لانگفورڈ کا کہنا ہے کہ حادثے کی تفصیلات کی ابھی تصدیق کی جا رہی ہے۔ حادثے میں کروڑوں ڈالرز مالیت کا جنگی جہاز تباہ ہوا ہے۔