چودھری پرویزالٰہی کا وزیراعظم کو اپوزیشن کے جال سے دور رہنے کا مشورہ

تفصیلات کے مطابق اسپیکر پنجاب اسمبلی چودھری پرویزالٰہی کا کہنا تھا کہ حکومت میں رہتے ہوئے اپوزیشن لیڈر جیسے بیانات سے حکومت کی اپنی سیاسی پوزیشن کمزور ہوتی ہے، اپوزیشن کی حکمت عملی ہمیشہ یہی ہوتی ہے کہ حکومت کو مشتعل کرنے کا کوئی موقع ہاتھ سے نہ جانے دے۔

ان کا کہنا تھا کہ اتحادی جماعتوں نے ہر مشکل وقت میں حکومت کا ساتھ دے کر اس کو اپوزیشن کے پنجوں سے چھڑایا ہے، اپوزیشن جیسے بیانات سے انتظامی مشینری کا مورال ڈاؤن ہوتا ہے۔

چودھری پرویزالٰہی کا کہنا تھا کہ اپوزیشن کی حکومت کے خلاف ہمیشہ یہی حکمت عملی ہوتی ہے کہ ہر مسئلے پر حکومت کو زچ کرے، حکومت کی سلامتی اور بھلائی اسی میں مضمر ہے وہ اپوزیشن کے جال میں نہ آئے۔

ان کا مزید کہنا تھا کہ حکومت کو عوام نے پانچ سال کا مینڈیٹ دیا، جس میں ابھی پونے دو سال باقی ہیں، اپوزیشن اگر جمہوریت پر یقین رکھتی ہے تو اس کو چاہیئے کہ حکومت کے اس عوامی مینڈیٹ کا احترام کرے۔