بھارت کے یوم جمہوریہ پر کشمیریوں کا یوم سیاہ، دنیا بھر میں احتجاج

 کنٹرول لائن کے دونوں جانب اور دنیا بھر میں مقیم کشمیری آج  بھارت کا یوم جمہوریہ یوم سیاہ کے طورپر منارہے ہیں ، اس  کا مقصد دنیا کی توجہ کشمیر پر بھارت کے مسلسل قبضے اور کشمیریوں کوگزشتہ 73 سال سے حق خودارادیت سے محروم رکھے جانے کی طرف مبذول کرانا ہے۔ 

آزاد جموں و کشمیر کے وزیر اعظم سردار عبدالقیوم نیازی نے تمام اضلاع کی انتظامیہ کو ہدایت کی ہے کہ ریلیاں اور اجتماعات منعقد کئے جائیں تاکہ عالمی برادری کو ایک مضبوط پیغام دیا جائے کہ کشمیری اپنے مادر وطن پر بھارت کا غیرقانونی تسلط کبھی تسلیم نہیں کریں گے۔

انہوں نے تمام سیاسی جماعتوں کی قیادت، تاجروں اور سول سوسائٹی سے اپیل کی کہ بھارت مخالف ریلیوں میں بھرپور شرکت کرکے کنٹرول لائن کے اس پار مقیم مظلوم کشمیریوں کے ساتھ اظہار ہمدردی کریں۔آزاد جموں و کشمیر کے دارالحکومت مظفر آباد میں کشمیر لبریشن سیل، پاسبان حریت اور دوسری مذہبی جماعتوں کی جانب سے احتجاجی ریلیاں نکالی جائیں گی۔

ادھر کل جماعتی حریت کانفرنس کے زیر حراست نائب چیئرمین شبیراحمد شاہ نے بھارت کے کشمیریوں کے مادر وطن پر غیرقانونی قبضے کے خلاف احتجاج کے طور پر کل بھارت کا یوم جمہوریہ یوم سیاہ کے طور پر منانے کے حریت کانفرنس کے عزم کا اعادہ کیا ہے۔

 دہلی کے بدنام زمانہ تہاڑ جیل سے اپنے ایک پیغام میں انہوں نے مقبوضہ وادی میں سول کرفیو برقرار رکھنے کی مذمت کی۔

بھارت نے26 جنوری 1950 کو اپنے آئین کی منظوری دی تھی، جس کے بعد  سے اس روز کو یوم جمہوریہ کے طور پر منایا جاتا ہے۔ اس سے قبل بھارت میں انگریز کا بنایا ہوا 1935 کا قانون نافذ تھا۔