ایف آئی اے نے حریم شاہ کے دو بینک اکاونٹس  منجمدکرنے کے لیے خط لکھ دئیے

تفصیلات کے مطابق  ٹک ٹاکر سٹار حریم شاہ کے خلاف منی لانڈرنگ کیس کے  معاملے پر ایف آئی اے نے  حریم شاہ کے دو بینک اکاونٹس  منجمدکرنے کے لیے خط لکھ دئیے۔

ایف آئی اے کا کہنا ہے کہ  ٹک ٹاک ا سٹار کا ایک  اکاؤنٹ لاہور اور دوسرا کراچی  میں  ہے، دونوں اکاونٹس  حریم شاہ  کے اصل نام فضا حسین کے نام سے  ہیں۔ایف آئی اے نے دونوں بنکوں  کی انتظامیہ کو اکاؤنٹس منجمد کرنے کے لیے  خط لکھا۔

رواں ماہ  ایف آئی اے کی جانب سے برطانیہ کی نیشنل کرائم ایجنسی کو  خط لکھا تھا جس میں کہا گیا تھا کہ  حریم شاہ نے دھوکا دہی کے ذریعے رقم اسمگل کرنے کا دعویٰ کیا، ان کی یہ ویڈیو مبینہ طور پر برطانیہ میں بنائی گئی۔  حریم شاہ کی جانب سے دھوکا دہی کے ذریعے رقم اسمگل کرنے کا دعویٰ کیا گیا، ٹک ٹاکر حریم شاہ کراچی سے دوحہ اور وہاں سے لندن ہیتھرو ایئرپورٹ پہنچی تھی۔

خط میں کہا گیا کہ دوسری ویڈیو میں حریم شاہ نے سارے معاملے کو مذاق قرار دیا، حریم شاہ کی تردیدی ویڈیو لندن میں اسکائی مارکیٹنگ کے دفتر میں ریکارڈ کی گئی جس میں دانیال ملک نامی شخص نے رقم کو قانونی قراردیا۔

ایف آئی اے نے نیشنل کرائم ایجنسی سے دونوں ویڈیو کے تناظر میں حریم شاہ اور دانیال ملک کے خلاف انکوائری کی سفارش کی تھی، اس میں یہ بھی کہا گیا تھا کہ منی لانڈرنگ پاکستان میں قابلِ سزا جرم ہے، تحقیقات میں سامنے آنے والی تفصیلات سے ایف آئی اے کو بھی آگاہ کیا جائے۔اس خط میں حریم شاہ کی سفری اور شناختی تفصیلات بھی فراہم کی گئی تھیں۔