راوی اربن پراجیکٹ ، سپریم کورٹ نے لاہور ہائیکورٹ کا فیصلہ معطل کر دیا، کام جاری رکھنے کی ہدایت

اسلام آباد : سپریم کورٹ سے پنجاب حکومت کو بڑا ریلیف مل گیاہے ، عدالت عظمیٰ نے راوی اربن ڈولپمنٹ پراجیکٹ کالعدم قرار دینے کا لاہور ہائیکورٹ کا فیصلہ معطل کر دیاہے اور پنجاب حکومت کو منصوبے پر کام جاری رکھنے کی ہدایت کر دی ہے ۔

تفصیلات کے مطابق سپریم کورٹ نے احکامات جاری کرتے ہوئے کہا ہے کہ جن زمینوں کی مالکان کو ادائیگی کر دی گئی ہے ان پر کام جاری رکھا جا سکتاہے اور جن زمینوں کے مالکان کو ادائیگی نہیں کی گئی وہاں کام نہیں ہو سکتا۔ سپریم کورٹ نے حکومتی اپلیوں پر فریقین کو نوٹس جاری کر دیئے ہیں اور کہا ہے کہ جائزہ لیں گے کہ فیصلے کے خلاف انٹرا کورٹ اپیل بنتی ہے یا نہیں ، اگر انٹر کورٹ اپیل بنتی ہوئی تو کیس لاہور ہائیکورٹ کو بھجوا دیں گے ۔

وکیل نے عدالت میں کہا کہ ہائیکورٹ نے آرڈیننس کے اجراء کو تقویض کردہ اختیار قرار دیاہے ، جسٹس اعجاز الاحسن نے ریمارکس دیتے ہوئے کہا کہ ہائیکورٹ نے امریکی آئین کا حوالہ دیا ہے ، امریکی ، پاکستان حالات اور آئین مختلف ہیں، وکیل نے کہا کہ ہائیکورٹ میں درخواست گزار ہاوسنگ سوسائٹیاں تھیں ، جسٹس مظاہر نقوی نے ریمارکس دیئے کہ ہاوسنگ سوسائٹیوں کا تو مفادات کا ٹکراو واضح ہے ۔