اپوزیشن کے کچھ لوگ اندر سے عمران خان کے ساتھ ہیں : شیخ رشید 

تفصیلات کے مطابق  راولپنڈی میں ماں، بچہ ہسپتال کے دورے کے موقع پر میڈیا سے گفتگو کرتے ہوئے وزیر داخلہ شیخ رشید نے کہا کہ جب میں نے کہا تھا کہ فنانس بل سینیٹ اور قومی اسمبلی سے منظور ہوجائے گا تب سوال کیا گیا تھا کہ سینیٹ سے کیسے منظور ہوگا؟ اب سب کو پتا لگ چکا ہے کہ ہم سینیٹ سے بھی بل منظور کروا سکتے ہیں۔  اپوزیشن کو بھی اب اندازہ ہوجانا چاہیے کہ ان کے 14 سے 15 افراد اندر سے عمران خان کے ساتھ ہیں ۔ 

ان کاکہنا تھا کہ اپوزیشن کو اب تحریک عدم اعتماد کی باتیں بھی چھوڑ دینی چاہیے،  ، عدم اعتماد کی بات کرنیوالوں کو پتہ ہونا چاہیے بندے لانا پڑتے ہیں۔ 

وفاقی وزیرداخلہ  نے کہا کہ  لانگ مارچ سے کچھ ہوگا نہ دھرنوں سے، وزیراعظم نے کابینہ میں ایمرجنسی اور صدارتی نظام کی کوئی بات نہیں کی ۔ بلاول زرداری 27 فروری کو آئیں، باقی بھی 23مارچ کو آئیں، موسم ابرآلود نہیں ہوگا، مطلع صاف ہوگا، مولانا فضل الرحمان کو بھی آنے کا شوق ہے تو آجائیں۔

شیخ رشید نے آئی ایم ایف کے بارے میں بات کرتے ہوئے کہا کہ 23 مرتبہ ہم آئی ایم ایف کے پاس جا چکے ہیں اور اب 24ویں بار جارہے ہیں کیونکہ معیشت کو مضبوط بنانے کے لیے یہ ہماری مجبوری ہے۔چین کو ہمارے آئی ایم ایف جانے پرکوئی اعتراض نہیں۔

ان  کا کہنا تھا کہ ساری دنیا کو افغانستان کی مدد کرنی چاہیے، چین ہمارا ہر موسم کا دوست ہے، وزیراعظم 3 فروری کو چین کا دورہ کریں گے، دورہ چین سے مستقبل کے معاملات پر پیشرفت ہوگی، امریکا کے ساتھ بھی اچھے تعلقات ہونے چاہئیں،

وزیر داخلہ نے کہا کہ کل بھارت کی ظالم افواج نے 5 پرامن کشمیری شہریوں کی جان لی ہے جس سے بھارت میں مسلمانوں کے ساتھ سلوک کا اندازہ ہوتا ہے ، بھارت کا بے بس مسلمان آج مدد کے لیے آسمان کی جانب یا پھر پاکستان کی جانب ہی دیکھتا ہے، 5 فروری کو انشااللہ ہم یوم یکجہتی کشمیر منائیں گے۔

شیخ رشید  کا کہنا تھا کہ وزیراعظم جلد لئی پروجیکٹ کا افتتاح کرنے جارہے ہیں، کسی کو تنگ نہیں کریں گے، مارکیٹ قیمت کے پیسے دیں گے، اس پروجیکٹ سے اس علاقے کی ساری غربت ختم ہونے جارہی ہے، آئندہ ہماری ساری توجہ نالا لئی پروجیکٹ پر ہوگی۔