اسلام آباد ہائی کورٹ کی اسحاق ڈار کے لاہور میں گھر کی نیلامی کیخلاف درخواست مسترد

تفصیلات کے مطابق  اسلام آباد ہائی کورٹ نے اسحاق ڈار کے لاہور میں گھر کی نیلامی  کے خلاف درخواست مسترد کردی ہے ۔ اسحاق ڈار کی اہلیہ نے نیلامی کے فیصلے کے خلاف عدالت سے رجوع کیا تھا ۔

اسحاق ڈار کا گلبرگ تھری لاہور میں گھر حکومت کو نیلام کرنے کی اجازت دے دی ہے، ہائیکورٹ نے گھر پر تبسم اسحاق ڈار کا دعویٰ مسترد کرنے کا فیصلہ برقرار رکھا ہے۔ اسلام آباد ہائیکورٹ نے گھر کی نیلامی پر دیا گیا اسٹے آرڈر بھی ختم کردیا ہے۔

تبسم اسحاق ڈار نے موقف اختیار کیا تھا کہ  گلبرگ تھری لاہور کا گھر میری ملکیت ہے ،  اسحاق ڈار نے 14 فروری 1989 کو گھر مجھے تحفے میں دیا تھا،  احتساب عدالت نے گھر پر میرے دعوے کی تحقیق کئے بغیر حکم جاری کیا ۔

خیا ل رہے کہ احتساب عدالت نے گلبرگ تھری لاہور کا گھر سات نومبر کو ضبط کر کے نیلام کرنے کا حکم دیا تھا۔