پی ایس ایل7:لاہور قلندرنے پشاورزلمی کو شکست دے دی

تفصیلات کے مطابق لاہور قلندرز کے 200 رنز کے ہدف کے تعاقب میں پشاور زلمی کی ٹیم مقررہ 20 اوورز میں 9 وکٹوں پر 170رنز بناسکی، حیدر علی 49رنز بناکر نمایاں رہے۔

کراچی کے نیشنل اسٹیڈیم میں کھیلے گئے میچ میں زلمی کے کپتان وہاب ریاض نے ٹاس جیت کر لاہور قلندرز کو پہلے بیٹنگ کی دعوت دی تھی۔

 لاہور قلندرز نے مقررہ 20 اوورز میں 4وکٹوں کے نقصان پر 199رنز بنائے، فخر زمان 66 رنز بناکر نمایاں رہے۔

اوپنر فخر زمان اور عبداللہ شفیق کے درمیان 94 رنز کی شراکت داری قائم ہوئی، تاہم عبداللہ 41 رنز بناکر آؤٹ ہوگئے۔

قلندرز کو دوسرا نقصان سیٹ بیٹر فخر زمان کی صورت میں اٹھانا پڑا، وہ 66 رنز بناکر پویلین لوٹے جبکہ کامران غلام 30 رنز بناسکے۔

اختتامی اوورز میں محمد حفیظ اور راشد خان کی جارحانہ بیٹنگ کی بدولت لاہور نے مقررہ 20 اوورز میں4 وکٹوں کے نقصان پر 199 رنز بنائے۔

حفیظ 19 گیندوں پر 37 جبکہ راشد خان 8 گیندوں پر 22 رنز بناکر ناٹ آؤٹ رہے۔

پشاور زلمی کی جانب سے سلمان ارشاد نے 2 جبکہ عثمان قادر اور حسین طلعت نے ایک ایک وکٹ حاصل کی۔

200 رنز کے ہدف کے تعاقب میں زلمی کا آغاز اچھا نہ رہا اور اوپنر حضرت اللہ ززئی صفر پر ہی آؤٹ ہوگئے۔

حسین طلعت 15 رنز بناکر پویلین لوٹے جبکہ کامران 41 رنز بناسکے۔تجربہ کار بیٹر شعیب ملک صرف 4 رنز بناکر ٹیم کا ساتھ چھوڑ گئے۔

زلمی کی جانب سے حیدر علی نے 49رنز کی اننگز کھیلی،اس کے علاوہ  رتھر فورڈ 21 اور بین کٹنگ 10رنز بناکر آؤٹ ہوئے۔ 
لاہور کی جانب سے زمان خان نے 3 جبکہ شاہین آفریدی اور ڈیوڈ ویزے نے 2،2 کھلاڑیوں کو آؤٹ کیا۔