بھارت: تمام ہائی اسکول اور کالج اگلے تین دن تک بند رہیں گے، وزیر اعلی کرناٹک

سماجی رابطے کی ویب سائٹ ٹوئٹر پر ایک ٹویٹ میں کرناٹک کے وزیر اعلی بسواراج بومئی نے کہا کہ  "میں تمام طلباء، اساتذہ اور اسکولوں اور کالجوں کی انتظامیہ کے ساتھ ساتھ کرناٹک کے لوگوں سے امن اور ہم آہنگی برقرار رکھنے کی اپیل کرتا ہوں۔ میں نے تمام ہائی اسکولوں اور کالجوں کو اگلے تین دن کے لیے بند رکھنے کا حکم دیا ہے۔ تمام متعلقہ افراد سے تعاون کی درخواست کی جاتی ہے۔" 

کرناٹک کے اُڈپی، شیموگا، باگل کوٹ اور دیگر حصوں میں 'حجاب' کے معاملے پر کچھ تعلیمی اداروں میں کشیدگی پھیل گئی، جس سے پولیس اور حکام کو مداخلت کرنے پر مجبور ہونا پڑا۔

کرناٹک ہائی کورٹ اُڈپی کے ایک گورنمنٹ پری یونیورسٹی کالج میں زیر تعلیم پانچ لڑکیوں کی طرف سے دائر درخواستوں کی سماعت کر رہی ہے، جس میں کالج میں حجاب کی پابندی پر سوال اٹھایا گیا ہے۔