آسٹریلوی چیف آف ڈیفنس فورسز کی چیئرمین جوائنٹ چیفس آف اسٹاف جنرل ندیم رضا سے ملاقات

پاک فوج کے شعبہ تعلقات عامہ (آئی ایس پی آر ) کی جانب سے جاری کردہ بیان کے مطابق  آسٹریلیا کے چیف آف ڈیفنس فورسز کا دورہ پاکستان۔ آسٹریلوی چیف آف ڈیفنس فورسز نے چیئرمین جوائنٹ چیفس آف اسٹاف جنرل ندیم رضا سے ملاقات کی، ملاقات میں دوطرفہ پیشہ ورانہ دلچسپی کے امور، عالمی اور علاقائی سلامتی کے ماحول اور دونوں مسلح افواج کے درمیان تعاون کے حوالے سے تبادلہ خیال کیا گیا۔

آئی ایس پی آر کا کہنا ہے کہ  ملاقات کے بعد پاک آسٹریلیا دفاع اور سیکورٹی مذاکرات کا 12واں اور 1.5 ٹریک سیکورٹی ڈائیلاگ کا 8واں راؤنڈ بھی ہوا، مذاکرات میں پاکستانی وفد کی قیادت چیئرمین جوائنٹ چیفس آف اسٹاف کمیٹی جنرل ندیم رضا نے جبکہ آسٹریلیا کی جانب سے چیف آف ڈیفنس فورس نے کی۔

ترجمان پاک فوج کے مطابق پاکستان اور آسٹریلیا کے تربیتی پروگرام، مشترکہ مشقوں اور دیگر دفاعی سرگرمیوں کے شعبوں میں جاری تعاون کا جائزہ لیا گیا اور سیکیورٹی اور دفاعی تعاون کو مزید مضبوط اور بڑھانے کے عزم کا اعادہ بھی کیا گیا۔

آئی ایس پی آر کا کہنا ہے کہ  دفاعی اور سلامتی مذاکرات 2006 میں شروع کیے گئے تھے اور اس کے بعد سے پاکستان اور آسٹریلیا میں متبادل بنیادوں پر باقاعدگی سے منعقد ہوتے رہے ہیں، اس فورم کے فریم ورک کے تحت دونوں ممالک کے درمیان دفاعی تعلقات بتدریج وسیع تر ہو رہے ہیں۔

ڈی جی آئی ایس پی آر نے کہا ہے کہ  آسٹریلوی معززین نے پاکستان کی مسلح افواج کے اعلیٰ پیشہ وارانہ معیار، دہشت گردی کے خلاف جنگ میں کامیابیوں اور علاقائی امن و استحکام بالخصوص افغانستان میں امن کے لیے جاری کوششوں کو سراہا۔