ہمیں ڈراموں میں کزنز کے درمیان شادیوں کی حوصلہ افزائی روکنی چاہیے: اشناشاہ

اداکارہ نے ٹوئٹر پر برطانوی نشریاتی ادارے بی بی سی کی ایک خبر شیئر کی جس میں بتایا گیا تھا کہ کزنز کے درمیان شادیوں کے بعد آنے والی نئی نسل کن بیماریوں میں مبتلا ہوتی ہے۔

اشنا نے لکھا کہ بطور فنکار اور تخلیق کار ہمیں چاہیے کہ ڈراموں میں کزنز کے درمیان ہونے والے رومانوی سین کی حوصلہ افزائی نہ کریں، کزنز کے درمیان ہونے والی شادیوں کے نتیجے میں آنے والی نسل کو کئی بیماریوں کا سامنا کرنا پڑتا ہے۔

اداکارہ نے لکھا کہ ان بچوں کو تھیلیسیمیا جیسے خطرناک خونی مرض کا سامنا ہوتا ہے، برائے مہربانی اس بات کو سنجیدہ لیا جائے۔

یاد رہے کہ پاکستان میں 65 سے 75 فیصد شادیاں خاندان میں ہوتی ہیں جن میں سے 80 فیصد شادیاں فرسٹ کزنز میں کی جاتی ہیں۔