شیخ رشید کا حکومت کو جہانگیر ترین سے بات چیت کا مشورہ

شیخ رشید احمد نے اسلام آباد میں پریس کانفرنس کرتے ہوئے کہا ہے کہ اپوزیشن بڑے شوق سے اسلام آباد آئے اسے کچھ نہیں ملے گا۔

ان کا کہنا تھا کہ جب بھی حکومت مخالف تحریک چلی، اس کا نتیجہ خواہش کے مطابق نہیں ملا، اگر وہ عدم اعتماد لاتی ہے تو اس سے بھی انہیں کچھ نہیں ملے گا اور ناکام ہوگی۔

انہوں نے کہا ہے کہ ساڑھے تین سال سے آپ کہہ رہے ہیں آج آرہے ہیں، کل آرہے ہیں، 172 ارکان لانا آپ کا کام ہے، بعد میں یہ کہیں گے کہ فون کالز آگئی تھیں، کورونا ہوگیا تھا، عمران خان سرخرو ہوگا اور اسے کسی فون کال کی ضرورت نہیں۔

 وزیر داخلہ نے کہا ہے کہ 23 مارچ کو اپوزیشن نہیں آئے گی اور اگر آتی ہے تو آ جائے، اپوزیشن نے کارڈز چھپائے ہیں تو عمران خان بھی چھاتی سے لگا کر کارڈ کھیلتا ہے۔

ان کا مزید کہنا تھا کہ ملاقاتوں کا کچھ نہیں نکلنا، الیکشن میں ایک سال تو رہ گیا ہے، اپوزیشن عدم اعتماد کا ووٹ لائے گی تب بھی پھنسے گی اور اس کا جو نتیجہ آئے گا اس پر بھی پھنسے گی۔