وزیراعظم آج دو روزہ دورہ روس کے لیے روانہ ہوں گے

اسلام آباد :  وزیراعظم  عمران خان آج سہہ پہردو روزہ دورہ روس کے لیے روانہ ہوں گے۔

تفصیلات کے مطابق وزیراعظم عمران خان کو  روس کےدارلحکومت ماسکو پہنچنے پرووونکووائیرپورٹ پر گارڈ آف آنر دیا جائے گا۔وزیراعظم ائیرپورٹ سے اپنی جائے رہائش روانہ ہوں گے۔ وزیراعظم عمران خان اور روسی صدر کی اہم ملاقات 24 فروری کو ہو گی،وزیراعظم کی روسی صدر کے ساتھ ون آن ون ملاقات اور وفود کی سطح پرملاقات ہو گی۔

وزیراعظم اور روسی ڈپٹی وزیراعظم کی ملاقات بھی شیڈول ہے۔ڈپٹی وزیراعظم روس کے ساتھ ملاقات میں توانائی کے شعبہ سے متعلق امور پر گفتگو ہو گی۔

ذرائع کا کہنا ہے کہ وزیراعظم کرنٹ افئیرزکے معروف روسی اینکر میخائل گسمین کو انٹرویو بھی دیں گے۔ وزیراعظم  عمران خان اسلامک سینٹر ماسکو کا دورہ کریں گے۔  روسی فیڈریشن کے گرینڈ مفتی سے ملاقات کریں گے۔

وہ  نجی ہوٹل میں روس کی معروف کاروباری شخصیات سے ملاقات بھی کریں گے،وزیراعظم 24 فروری کو وطن واپس روانہ ہوں گے۔