امریکا  میں دو بلیک ہاک ہیلی کاپٹر آپس میں ٹکرا کرزمین بوس ہوگئے

غیر ملکی خبر رساں ادارے کے مطابق  امریکا کی ریاست یوٹاہ  کی معروف سالٹ لیک سٹی میں دو بلیک ہاک ہیلی کاپٹر آپس میں ٹکرا کر زمین بوس ہوگئے، دونوں ہیلی کاپٹر تربیتی پرواز پر مامور تھے۔ ہیلی کاپٹر ممکنہ طور پر موسم کی خرابی کے باعث  گر کر تباہ ہوئے۔ دونوں ہیلی کاپٹرز میں مجموعی طور پر 5 اہلکار سوار تھے۔

ترجمان ریسکیو ٹیم کا کہنا ہے کہ  واقعے میں کوئی جانی نقصان نہیں ہوا  جبکہ دونوں ہیلی کاپٹرز میں موجود تمام افراد مکمل طور پر محفوظ ہیں، حادثے سے ہیلی کاپٹرز کو معمولی نقصان پہنچا ہے۔

امریکا کی یوٹاہ نیشنل آرمی گارڈز نے واقعے کی تحقیقات کے لیے انکوائری کمیٹی تشکیل دیدی ہے۔

خیال رہے کہ  حادثے کا شکار ہونے والے ہیلی کاپٹرز یوٹاہ کے نیشنل گارڈز کی ملکیت تھے جو کہ ایک طرح کی ریاست کی فوج ہے۔