عمران خان کے پاس تین دن ہیں استعفیٰ دیں اور چلے جائیں:بلاول بھٹو

اوکاڑہ میں عوامی مارچ سے خطاب کرتے ہوئے بلاول بھٹو کا کہنا تھا کہ استعفیٰ نہ دینےکی صورت میں عمران خان اسمبلی توڑیں اور مقابلہ کریں، ورنہ ہم اسلام آباد آرہے ہیں،کٹھ پتلی کوگھربھیج کرصاف اورشفاف انتخابات کرائیں گے۔

بلاول بھٹوکا کہنا تھا کہ عوام کا عمران خان سے اعتماد اٹھ چکا، اب پارلیمنٹ میں بھی تحریک عدم اعتماد لانی چاہیے، عمران خان نے ہر وعدے پر یو ٹرن لیا، یو ٹرن لینا جھوٹوں اور منافقوں کی نشانی ہوتی ہے، لیڈر کی نہیں،بی بی شہید نے شہادت قبول کی لیکن اپنے مؤقف سے پیچھے نہیں ہٹیں۔

چیئرمین پیپلز پارٹی کا کہنا تھا کہ ہم نے مشرف کو بھگا کر بے نظیر بھٹو شہیدکا مشن بحال کیا، ہم نے این ایف سی کے تحت صوبوں کو ان کا حق دلایا،صدر زرداری کے سی پیک کی وجہ سے یہ پنجاب میں بڑے منصوبے بناسکے، جو پاکستانی یورپ اورمشرق وسطیٰ  میں کام کررہے ہیں وہ قائد عوام کی وجہ سے کررہے ہیں۔

ان کا کہنا تھا کہ عوام نے ثابت کر دیا کل بھی بھٹو زندہ تھا آج بھی بھٹو زندہ ہے۔ پیپلز پارٹی نے ملک میں 73 کے آئین کو بحال کرایا جبکہ آج پیپلز پارٹی سلیکٹڈ اور نااہل وزیراعظم کے خلاف احتجاج کر رہی ہے۔

ان کا مزید کہنا تھا کہ حکومت نے زراعت کے شعبے کے لیے کچھ نہیں کیا جس کی وجہ سے آج کسانوں کا استحصال ہو رہا ہے۔