علیم خان کی ترین گروپ میں شمولیت ، پی ٹی آئی قیاد ت آج سر جوڑ کر بیٹھے گی 

تفصیلات کے مطابق   پنجاب میں ترین گروپ کے معاملات پر گورنر سندھ عمران اسماعیل نے وفاقی وزیر اطلاعات کو علیم خان سے ہونے والی بات چیت سے آگاہ کیا ۔ جس کے بعد فواد چوہدری اور عمران اسماعیل وزیراعظم سے ملاقات کیلئے بنی گالا روانہ ہوگئے  ہیں جہاں وہ وزیراعظم کو تفصیلات سے آگاہ کریں گے ۔ 

 میڈیا سے گفتگو کرتے ہوئے عمران اسماعیل  نے کہا کہ علیم خان،جہانگیر ترین اور باقی دوست پارٹی کا اثاثہ ہیں، نہیں لگتا کہ کوئی ایسی مجبوری یا دوری اتنی ہو جائے کہ قریب بھی نہیں آ سکیں، ان شاء اللہ سارے حالات ٹھیک ہو جائیں گے۔ 

 گورنر سندھ نے کہا کہ میں سمجھتا ہوں آج بیٹھ کر چیزوں کو ہینڈل کر لیں گے،  وہ آج بھی پارٹی اسے اتنی محبت کرتے ہیں جتنی کل کرتے تھے، عمران خان کیلئے ان کے دل میں اتنی ہی محبت ہے جتنی کل تھی، تھوڑی ناراضگی کسی معاملے پر ہو جاتی ہے،ان معاملات کو حل کر لیں گے۔  ان کاکہنا تھا کہ علیم خان خود وزیراعظم عمران سے ملاقات کریں گے۔ 

 خیال رہے  کہ گزشتہ روز وزیراعظم عمران خان کی جانب سے ٹاسک ملنے کے بعد گورنر سندھ عمران اسماعیل نے پاکستان تحریک انصاف کے رکن صوبائی اسمبلی عبدالعلیم خان سے ملاقات کی۔

واضح رہے کہ گزشتہ روز حکمران جماعت پاکستان تحریک انصاف (پی ٹی آئی) کے سینئر رہنما علیم خان نے جہانگیر ترین گروپ میں شمولیت کا اعلان کرتے ہوئے اپنی پارٹی کی حکومت پنجاب کی کارکردگی پر گہری تشویش کا اظہار کیا تھا۔